28-mart kuni Turkiyadagi uchta muxolifat partiyasi vakillari Oliy saylov komissiyasiga amaldagi prezident Rajab Toyyib Erdo‘g‘onni may oyida bo‘lib o‘tadigan prezidentlik saylovlari uchun nomzodlar ro‘yxatidan chiqarib tashlashni talab qilib, ariza topshirdi.
Yaxshi partiya, Demokratiya va yutuq partiyasi hamda Vatan partiyasi arizasiga ko‘ra, Erdo‘g‘onning nomzodi konstitutsiyaga zid, chunki u allaqachon ikki marta prezident etib saylangan. 2014 va 2018-yillardagi prezidentlik saylovlarida g‘alaba qozongan Erdo‘g‘on faqat Turkiya parlamenti muddatidan oldin saylovlar e’lon qilgan taqdirda, uchinchi marta nomzodini qo‘yish huquqiga ega bo‘lar edi, deya ta’kidlaydi muxolifatchilar. Ammo 14-may kuni bo‘lib o‘tadigan saylovni prezidentning o‘zi belgilagan.
O‘z navbatida, 28-mart kuni hukmron Adolat va taraqqiyot partiyasi spikeri O‘mer Chelik Erdo‘g‘onning saylovlarda ishtirok etishiga hech qanday to‘siq yo‘qligini aytdi. Unga ko‘ra, 2018-yilda konstitutsiya o‘zgartirilgandan so‘ng u ilk bor yangi prezidentlik tizimi bo‘yicha saylangan, shu bois uning avvalgi prezidentlik muddati hisobga olinmaydi. Konstitutsiyaviy huquq sohasidagi turkiyalik ekspertlar qonun normalari Erdo‘g‘onga yana nomzodini qo‘yishga imkon beradimi yoki yo‘qmi, degan masalada bir fikrga kela olmayapti. Bu yilgi saylovlarda Turkiya prezidentligiga nomzodlarning yakuniy ro‘yxati 31-mart kuni e’lon qilinishi kutilmoqda.
Izoh (0)