Vladimir Zelenskiy Xitoy rahbari Si Szinpinni Ukrainaga taklif qildi
Ukraina rasmiylari Vladimir Zelenskiy va Xitoy rahbari Si Szinpin o‘rtasida uchrashuv tashkillashtirishni istamoqda. Bu haqda Ukraina prezidenti Associated Press agentligiga bergan intervyusida aytdi.
“Biz uni ko‘rishga tayyormiz. Men u bilan gaplashmoqchiman. U bilan keng ko‘lamli urush boshlanishidan oldin gaplashgandim. Ammo bu yil davomida, bir yildan ortiq vaqt davomida muloqot qilmadik”, — dedi Zelenskiy.
Shuningdek, u Rossiya prezidenti Vladimir Putinning Belarusda taktik yadroviy qurolni joylashtirish to‘g‘risidagi qarorini Si Szinpinning Moskvaga tashrifi natijalari bilan bog‘liqligini taxmin qildi. Uning fikricha, Si Rossiya rahbariyatiga kutilgan kafolatlarni bermagan.
“Bu nimani anglatadi? Demak, tashrif Rossiyaga foyda keltirmagan”, — dedi Zelenskiy.
Ukraina prezidenti, shuningdek, agar Rossiya Baxmutni olishga muvaffaq bo‘lsa, Moskva Kiyevdan nomaqbul murosalarni talab qilishi, shuningdek, boshqa davlatlar yordamiga tayanishi mumkinligiga ishonch bildirdi.
Mart oyi boshida Wall Street Journal nashri Xitoy rahbari Si Zelenskiyga Rossiyaga tashrifidan keyin qo‘ng‘iroq qilishni rejalashtirgani haqida xabar bergandi. Si Szinpin 22-mart kuni Moskvaga safarini yakunlagan, biroq Kiyev haligacha suhbat o‘tkazilishi haqida rasmiy tasdiq olmagan. Ukraina prezidenti ofisi suhbatni tashkillashtirishga Xitoyning urush bo‘yicha pozitsiyasi to‘sqinlik qilayotganini tushuntirdi.
“Bu juda qiyin. Xitoy hali o‘zining yangi siyosiy o‘rnini topa olmagani masalasi bor. Ya’ni, u Rossiya va Ukraina o‘rtasidagi kelishuv masalasini o‘z zimmasiga olmoqchimi yoki ehtiyotkorlik bilan chetga chiqadimi? Tushunishimcha, Xitoy hali buni hal qilmagan”, — dedi prezident ofis rahbari maslahatchisi Mixail Podolyak.
