Baxmutda Rossiya va Ukraina o‘rtasidagi janglar soni kamaygani sababi ma’lum qilindi

Jang o‘chog‘i bo‘lgan Baxmutda Rossiya va Ukraina kuchlari o‘rtasida jangovar to‘qnashuvlar soni kamaydi. Ukraina Qurolli kuchlarining sharqiy guruhi spikeri Sergey Cherevatiy buning sababini aytdi.

Cherevatiyning so‘zlariga ko‘ra, Baxmut yo‘nalishida kun davomida rus kuchlari bilan 19 ta jang bo‘lib o‘tdi, shundan 14 tasi shaharda qayd etilgan.

“Oxirgi uch kun ichida janglar soni kamaydi, ammo Baxmutdagi vaziyatni jiddiy tahlil qilish kerak, bunga qo‘shinlarning ma’lum bir qayta guruhlanishi sabab bo‘lgan bo‘lishi mumkin. O‘ylaymanki, keyingi kunlar yoki bir hafta ichida bunga nima sabab bo‘lganini bilishimiz mumkin”, — dedi Cherevatiy.

Baxmut yo‘nalishida Rossiyaning asosiy zarba beruvchi kuchi “Vagner”ning askarlari bo‘lib qolmoqda, ammo ular muntazam qo‘shinlar bilan mustahkamlangan. Kun davomida Rossiya artilleriya va reaktiv tizimi bilan 104 marta zarba bergan. 27-mart kuni esa Rossiya Baxmutning o‘ziga 70 marta zarba bergan.

Cherevatiy to‘qnashuvlar davomida 86 nafar rossiyalik harbiy yo‘q qilingani, 117 nafar Rossiya kuchlari esa yaralanganini ma’lum qildi. Rossiyaning “Gvozdika” o‘ziyurar qurollari va “Strij” stansiyasi Ukraina mudofaa kuchlari tomonidan o‘qqa tutilgan.