O‘zbekistonning Shvetsiyadagi muvaqqat ishlar vakili Nodir G‘aniyev Uppsala va Syodertyorn universitetlari professori, tarix va geografiya fanlari bo‘yicha mutaxassis Mark Bassin bilan uchrashdi. Bu haqda “Dunyo” agentligi xabar berdi.
Qayd etilishicha, muloqot chog‘ida O‘zbekistonda so‘nggi yillar davomida inson huquqlari, so‘z erkinligi, gender tengligi va qonun ustuvorligini taʼminlash borasida erishilgan aniq natijalar, shuningdek, mamlakat Konstitutsiyasiga kiritilayotgan o‘zgarishlar va 30-aprel kuni bo‘lib o‘tadigan umumxalq referendumiga doir batafsil maʼlumotlar suhbatdoshning eʼtiboriga havola qilingan.
Muzokaralar davomida O‘zbekiston oliy taʼlim muassasalari, jumladan, Jahon iqtisodiyoti va diplomatiya universiteti hamda Shvetsiya universitetlari o‘rtasida hamkorlik aloqalarini yo‘lga qo‘yish istiqbollari muhokama qilingan.
Uchrashuv yakunida o‘zaro aloqalarni davom ettirish hamda Mark Bassinning O‘zbekistonga amaliy safarini va uning doirasida respublika oliy taʼlim muassasalari mutasaddilari bilan ikki tomonlama uchrashuvlarni tashkil etish masalasini birgalikda ishlab chiqishga kelishib olingan.
Avvalroq Quacquarelli Symonds — QS World University Rankings xalqaro reyting agentligi 2023-yilgi dunyo universitetlarining “Fan sohalari reytingi” (Subject Rankings) natijalarini eʼlon qilgani va O‘zbekistonning ikki universiteti ushbu reytingdan o‘rin olgani to‘g‘risida xabar berilgandi.
Izoh (0)