O‘zbekistonda qaysi universitetlar 2022-yilda eng ko‘p daromad ko‘rgani ma’lum bo‘ldi

O‘zbekistondagi davlat oliy ta’lim muassasalarining 2022-yilda ko‘rgan daromadlari va xarajatlariga oid ma’lumotlar e’lon qilindi.

Oliy ta’lim, fan va innovatsiyalar vazirligi tomonidan e’lon qilingan ma’lumotlarda keltirilishicha, 2022-yilda davlat OTMlari 8,77 trillion so‘mdan ortiq daromad ko‘rgan, xarajatlari esa 8,102 trillion so‘mdan ziyodni tashkil etgan.

Oliy ta’lim muassasalarining daromadlari budjetdan moliyalashtirilgan mablag‘lar, to‘lov-kontrakt asosida o‘qitish uchun tushgan tushumlar, rivojlantirish mablag‘lari bo‘yicha daromadlar hisobidan shakllantiriladi.

2022-yilda eng ko‘p sof daromad ko‘rgan oliy ta’lim muassasalarining qisqa ro‘yxati quyidagicha:

• Toshkent davlat iqtisodiyot universiteti – 106,2 milliard so‘m;
• Namangan davlat universiteti – 67,7 milliard so‘m;
• Berdaq nomidagi Qoraqaloq davlat universiteti – 54,4 milliard so‘m;
• Guliston davlat universiteti – 54 milliard so‘m;
• Navoiy davlat pedagogika instituti – 43,2 milliard so‘m.

2022-yilda eng ko‘p xarajat qilgan OTMlar:

• Samarqand davlat universiteti — 42,5 milliard so‘m;
• Qarshi davlat universiteti — 28,3 milliard so‘m;
• Samarqand davlat chet tillar instituti — 26,8 milliard so‘m;
• Farg‘ona politexnika instituti — 15,3 milliard so‘m;
• Ajiniyoz nomidagi Nukus davlat pedagogika instituti — 15 milliard so‘m.

Ma’lumot uchun, O‘zbekistonda 2016—2022-yillarda 122 ta oliy ta’lim muassasasi ochilgan. O‘tgan olti yil ichida respublikada yoshlarni oliy ta’limga qamrab olish darajasi 9 foizdan 38 foizga oshgan. 2026-yilga borib bu ko‘rsatkich 50 foizga yetkazilishi rejalashtirilgan.