Quacquarelli Symonds — QS World University Rankings xalqaro reyting agentligi 2023-yilgi dunyo universitetlarining “Fan sohalari reytingi” (Subject Rankings) natijalarini eʼlon qildi. Reytingdan O‘zbekistonning ikki universiteti ham o‘rin oldi, deb xabar beradi Oliy ta’lim, fan va innovatsiyalar vazirligi.
Qayd etilishicha, O‘zbekiston milliy universiteti va “Toshkent irrigatsiya va qishloq xo‘jaligini mexanizatsiyalash muhandislari” Milliy tadqiqot universiteti 4 ta (zamonaviy tillar, matematika, fizika va astronomiya, atrof-muhit) fan bo‘yicha top-500 oliy taʼlim muassasalari qatoridan o‘rin egallagan.
Bundan tashqari, O‘zbekiston oliygohlari ilk bor sohalar bo‘yicha reytingda ishtirok etgan. “Toshkent irrigatsiya va qishloq xo‘jaligini mexanizatsiyalash muhandislari” Milliy tadqiqot universiteti “Muhandislik va texnologiya” sohasi bo‘yicha reytingda 451–500-o‘rin va “Tabiiy fanlar” bo‘yicha 501–520-o‘rinni egalladi.
Maʼlumot uchun, O‘zbekiston milliy universiteti 2022-yilgi reytingda “Matematika” sohasida 451–500-o‘rinda ko‘rilgan bo‘lsa, bu yil shu yo‘nalish bo‘yicha 100 pog‘ona yuqoriga ko‘tarilgan.
QS World University Rankings by Subject — dunyo universitetlarini 51 ta fan sohasi bo‘yicha ish beruvchilar va xalqaro ilmiy jamiyat o‘rtasida o‘tkaziladigan so‘rovnoma, yaʼni fan sohalarida oliy taʼlim muassasasining nufuzi, Scopus xalqaro ilmiy-texnik maʼlumotlar bazasida nashr etilgan ilmiy maqolalarga iqtiboslar va Xirsh indeksi, shuningdek xalqaro hamkorlik ko‘rsatkichlarini International Research Network (IRN) maʼlumotlarining baholanishini nazarda tutadi.
Eslatib o‘tamiz, 2019-yilning oktabrida prezident Shavkat Mirziyoyev 2030-yilgacha oliy ta’lim tizimini rivojlantirish konsepsiyasini tasdiqlovchi qarorga imzo chekkan edi. Unga ko‘ra, O‘zbekiston Milliy universiteti va Samarqand davlat universitetini ilg‘or universitetlarga aylantirish va ulardagi ta’lim darajasini dunyoning 500 ta eng yaxshi universitetlari qatoriga qo‘shish rejalashtirilgan.
Izoh (0)