Jizzax viloyati Zarbdor tumanida 2022-yil 2-sentabr kuni er janjal oqibatida xotinini pichoqlab o‘ldirgani haqida xabar berilgan edi. Oliy sud matbuot kotibi mazkur erkakka nisbatan sud hukmi o‘qilganini maʼlum qildi.
Hodisa 2-sentyabr kuni soat 15:20 larda tumanning “Yangihayot” mahallasida sodir bo‘lgan. Mazkur mahallada yashovchi er-xotin o‘zaro janjallashib qolgan. Janjal vaqtida er ayolini farzandlarining ko‘z oldida yuvinish xonasiga sudrab borgan va ko‘krak qafasi chap tomoniga o‘tkir tig‘li jism bilan bir necha marta urib, hayot uchun xavfli bo‘lgan og‘ir tan jarohati yetkazgan. Oqibatda 3 nafar voyaga yetmagan farzandi bo‘lgan ayol voqea joyida vafot etgan.
Maʼlum qilinishicha, ushbu jinoyatning sodir etilishiga oiladagi kelishmovchilik, asosan moddiy tomondan yetishmovchilik sabab bo‘lgani aniqlandi. Ayolning vafotiga sabab bo‘lgan janjal farzandlarining maktabga kiyib borishi uchun kiyim olishiga moddiy tomonlama yetishmovchilik bo‘lgani oqibatida kelib chiqqan.
Sud barchaning ko‘rsatmasini tinglab, jinoyat ishi hujjatlarini o‘rganib chiqdi. Ayblanuvchi Jinoyat kodeksining 97-moddasi 2-qismida nazarda tutilgan jinoyatni sodir etganlikda aybdor deb topildi va 17 yil ozodlikdan mahrum qilindi.
Izoh (0)