Buxoro shahrida joylashgan istirohat bog‘ida er-xotin va ularning farzandi attraksiondan yiqildi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, 26-mart kuni soat 15:51 da RSHTTYoIM Buxoro filiali shifokori viloyat Ichki ishlar boshqarmasining “102” markazlashgan elektron tizimiga qo‘ng‘iroq qilib, Fathobod ko‘chasida yashovchi Q.S., X.A. va ularning farzandi F. A.lar tan jarohati olib, tibbiy muolaja olish uchun murojaat qilganini bildirgan.
Mazkur xabarnoma Buxoro shahar IIO FMB 1-son IIB masʼul xodimlari tomonidan tegishli tartibda qayddan o‘tkazilgan va zudlik bilan hodisa joyiga tezkor-tergov guruhi yuborilgan.
Qayd etilishicha, hodisa sodir bo‘lgan Buxoro shahar Xo‘jag‘unjoriy mahallasi Havzi bodom ko‘chasida joylashgan “Somoniylar” istirohat bog‘i hududida joylashgan “Tvister” nomli YATT R.E. va X.Sh.ga tegishli bo‘lgan charxpalak attraksioni ko‘zdan kechirilgan. Shunda attraksiondagi oq-qizil rangda bo‘lgan bitta arg‘imchoq o‘z o‘qi atrofidan chiqib, taxminan 6 metr uzoqlikka uchib tushgani natijasida arg‘imchoqda bo‘lgan Q.S va uning turmush o‘rtog‘i X.A. hamda ularning farzandi F.A. tan jarohati olganligi aniqlangan.
Izoh (0)