Жиззах вилояти Зарбдор туманида 2022 йил 2 сентябрь куни эр жанжал оқибатида хотинини пичоқлаб ўлдиргани ҳақида хабар берилган эди. Олий суд матбуот котиби мазкур эркакка нисбатан суд ҳукми ўқилганини маълум қилди.
Ҳодиса 2-сентябр куни соат 15:20 ларда туманнинг “Янгиҳаёт” маҳалласида содир бўлган. Мазкур маҳаллада яшовчи эр-хотин ўзаро жанжаллашиб қолган. Жанжал вақтида эр аёлини фарзандларининг кўз олдида ювиниш хонасига судраб борган ва кўкрак қафаси чап томонига ўткир тиғли жисм билан бир неча марта уриб, ҳаёт учун хавфли бўлган оғир тан жароҳати етказган. Оқибатда 3 нафар вояга етмаган фарзанди бўлган аёл воқеа жойида вафот этган.
Маълум қилинишича, ушбу жиноятнинг содир этилишига оиладаги келишмовчилик, асосан моддий томондан етишмовчилик сабаб бўлгани аниқланди. Аёлнинг вафотига сабаб бўлган жанжал фарзандларининг мактабга кийиб бориши учун кийим олишига моддий томонлама етишмовчилик бўлгани оқибатида келиб чиққан.
Суд барчанинг кўрсатмасини тинглаб, жиноят иши ҳужжатларини ўрганиб чиқди. Айбланувчи Жиноят кодексининг 97-моддаси 2-қисмида назарда тутилган жиноятни содир этганликда айбдор деб топилди ва 17 йил озодликдан маҳрум қилинди.
Изоҳ (0)