Yaqin uch yil ichida Britaniya hukumati 190 mingdan ortiq muhojirni deportatsiya qilishi mumkin. Ulardan 45 mingga yaqini — bolalar. Bu haqda Britaniya qochqinlar kengashi saytida e’lon qilingan hisobotda aytiladi.
Buning uchun Buyuk Britaniya hukumati noqonuniy migratsiya bo‘yicha yangi qonunni qabul qilishi kerak. Noqonuniy muhojirlarning aksariyati Eritreya, Sudan, Suriya va Erondan keladi. Ular 28 kunga hibsga olinishi, keyin deportatsiya qilinishi mumkin. Tashkilot, shuningdek, 45 ming bolani ham xuddi shunday taqdir kutayotganini aytdi. Kengash hisob-kitobiga ko‘ra, deportatsiya qilinishi mumkin bo‘lmagan muhojirlarning vaqtinchalik ushlab turilishi mamlakatga to‘qqiz milliard funt sterlingga tushmoqda.
Shuningdek, hisobotga ko‘ra, har yili 65 mingga yaqin odam La-Mansh bo‘g‘ozi bo‘ylab rezina qayiqlarda chegarani kesib o‘tadi. Jamoatlar palatasi tomonidan ko‘rib chiqiladigan yangi qonun loyihasi La-Mansh orqali puflama qayiqlarda kelgan noqonuniy muhojirlarni zudlik bilan mamlakatdan chiqarib yuborishni nazarda tutadi.
Qonun loyihasi tashabbuskori — Rishi Sunak hukumati.
Izoh (0)