Британия ҳукумати 190 мингдан ортиқ муҳожирни депортация қилиши мумкин

Яқин уч йил ичида Британия ҳукумати 190 мингдан ортиқ муҳожирни депортация қилиши мумкин. Улардан 45 мингга яқини — болалар. Бу ҳақда Британия қочқинлар кенгаши сайтида эълон қилинган ҳисоботда айтилади.

Бунинг учун Буюк Британия ҳукумати ноқонуний миграция бўйича янги қонунни қабул қилиши керак. Ноқонуний муҳожирларнинг аксарияти Эритрея, Судан, Сурия ва Эрондан келади. Улар 28 кунга ҳибсга олиниши, кейин депортация қилиниши мумкин. Ташкилот, шунингдек, 45 минг болани ҳам худди шундай тақдир кутаётганини айтди. Кенгаш ҳисоб-китобига кўра, депортация қилиниши мумкин бўлмаган муҳожирларнинг вақтинчалик ушлаб турилиши мамлакатга тўққиз миллиард фунт стерлингга тушмоқда.

Шунингдек, ҳисоботга кўра, ҳар йили 65 мингга яқин одам Ла-Манш бўғози бўйлаб резина қайиқларда чегарани кесиб ўтади. Жамоатлар палатаси томонидан кўриб чиқиладиган янги қонун лойиҳаси Ла-Манш орқали пуфлама қайиқларда келган ноқонуний муҳожирларни зудлик билан мамлакатдан чиқариб юборишни назарда тутади.

Қонун лойиҳаси ташаббускори — Риши Сунак ҳукумати.