Gruziyaning hibsdagi sobiq prezidenti Mixail Saakashvili bir necha oydan beri davolanayotgan klinika rahbariyati bundan buyon siyosatchining u yerda qolishi maqsadga muvofiq emas, deb hisoblamoqda.
“Novosti Gruziya” xabariga ko‘ra, tibbiyot muassasasi ushbu masala bilan mamlakat penitentsiariya xizmatiga murojaat qilmoqchi. Tibbiyot muassasasi rahbariyati Saakashvili faqat simptomatik davolanishga rozi ekanini, uni istalgan muassasa olishi mumkinligini aytdi. Shuningdek, siyosatchining klinika xodimlariga ishonchsizlik bildirayotgani qayd etildi.
“2022-yil oktabr oyidan beri bemor belgilangan davolash kursidan bosh tortib kelmoqda”, — deb tushuntirdi klinika rahbariyati va bunday vaziyat tufayli “obro‘sidan ayrilishni” istamasligini qo‘shimcha qildi.
Saakashvilining advokati klinikaning niyatini izohlar ekan, agar Saakashvili qamoqqa qaytsa, bu “o‘lim jazosi” bo‘lishini aytdi.
Saakashvilining ahvoli
Hozirda Saakashvilining ahvoli og‘ir. Qarindoshlarining aytishicha, u juda ozib ketgan, organizm ovqatni qabul qilmayapti. Saakashvilining o‘zi va oilasi uning xorijda davolanishini talab qilmoqda. Gruziya rasmiylari bunga rozi emas.
Muxolifatdagi “Mtavari” telekanali Saakashvilining oilasi polshalik shifokorlar uni kelib ko‘rishiga umid qilayotgani haqida xabar bergandi. Yevropa Ittifoqidagi diplomatik manbalar Tbilisi bunga rozi bo‘lgani haqida norasmiy maʼlumot bergan, biroq tashrif sanasi aniq emas.
Izoh (0)