Rossiya O‘zbekiston bilan yadro fizikasi sohasida kadrlar tayyorlash bo‘yicha hamkorlikni yo‘lga qo‘ymoqchi. Bu haqda Oliy taʼlim, fan va innovatsiyalar vazirligi axborot xizmati xabar berdi.
Xabarga ko‘ra, Oliy taʼlim, fan va innovatsiyalar vazirligida Rossiya prezidentining xalqaro madaniy hamkorlik masalalari bo‘yicha maxsus vakili Mixail Shvidkoy bilan uchrashuv bo‘lib o‘tdi. Unda Rossiyaning O‘zbekistondagi elchisi ham qatnashdi. Mixail Shvidkoy O‘zbekistonda davlat boshqaruvi tizimidagi o‘zgarishlarni ijobiy baholadi. U Rossiya oliy taʼlim muassasalarining O‘zbekistondagi filiallari faoliyatini doimiy qo‘llab-quvvatlayotgani uchun respublika rahbariyatiga minnatdorlik bildirdi.
Elchi Rossiya tomoni navbatdagi O‘zbekiston-Rossiya taʼlim forumini 2023-yilning ikkinchi yarmida Sankt-Peterburgda o‘tkazish imkoniyati ko‘rib chiqilayotganini aytib o‘tdi. Mixail Shvidkoy, bundan tashqari, ushbu forumni taʼlim sohasidagi ikki tomonlama hamkorlikni muhokama qilish uchun muntazam platforma sifatida rivojlantirishni taklif qildi.
Rossiya prezidentining maxsus vakili ilmiy va innovatsion faoliyat sohasidagi hamkorlik masalalariga ham to‘xtalib o‘tdi. O‘zbekiston Milliy universiteti, Samarqand davlat universiteti va Toshkent davlat texnika universiteti kabi oliy taʼlim muassasalarining Dubna shahridagi Yadro tadqiqotlari qo‘shma instituti loyihalarida ishtirok etish va yadro fizikasi sohasida kadrlar tayyorlash bo‘yicha hamkorlikni yo‘lga qo‘yishni maqsad qilgani qayd etildi.
Shuningdek, O‘zbekistondagi OTMlarning fan va innovatsiyalar bo‘yicha masʼul prorektorlar malakasini oshirish maqsadida Innopolis universitetiga (Qozon, Tatariston Respublikasi) yuborish amaliyotini davom ettirish taklif etildi.
Maʼlumot uchun, O‘zbekiston—Rossiya uchinchi taʼlim forumi 2022-yilning 26-27-oktabr kunlari Samarqand shahrida bo‘lib o‘tgandi.
Izoh (0)