Россия Ўзбекистон билан ядро физикаси соҳасида кадрлар тайёрлаш бўйича ҳамкорликни йўлга қўймоқчи. Бу ҳақда Олий таълим, фан ва инновациялар вазирлиги ахборот хизмати хабар берди.
Хабарга кўра, Олий таълим, фан ва инновациялар вазирлигида Россия президентининг халқаро маданий ҳамкорлик масалалари бўйича махсус вакили Михаил Швидкой билан учрашув бўлиб ўтди. Унда Россиянинг Ўзбекистондаги элчиси ҳам қатнашди. Михаил Швидкой Ўзбекистонда давлат бошқаруви тизимидаги ўзгаришларни ижобий баҳолади. У Россия олий таълим муассасаларининг Ўзбекистондаги филиаллари фаолиятини доимий қўллаб-қувватлаётгани учун республика раҳбариятига миннатдорлик билдирди.
Элчи Россия томони навбатдаги Ўзбекистон-Россия таълим форумини 2023 йилнинг иккинчи ярмида Санкт-Петербургда ўтказиш имконияти кўриб чиқилаётганини айтиб ўтди. Михаил Швидкой, бундан ташқари, ушбу форумни таълим соҳасидаги икки томонлама ҳамкорликни муҳокама қилиш учун мунтазам платформа сифатида ривожлантиришни таклиф қилди.
Россия президентининг махсус вакили илмий ва инновацион фаолият соҳасидаги ҳамкорлик масалаларига ҳам тўхталиб ўтди. Ўзбекистон Миллий университети, Самарқанд давлат университети ва Тошкент давлат техника университети каби олий таълим муассасаларининг Дубна шаҳридаги Ядро тадқиқотлари қўшма институти лойиҳаларида иштирок этиш ва ядро физикаси соҳасида кадрлар тайёрлаш бўйича ҳамкорликни йўлга қўйишни мақсад қилгани қайд этилди.
Шунингдек, Ўзбекистондаги ОТМларнинг фан ва инновациялар бўйича масъул проректорлар малакасини ошириш мақсадида Иннополис университетига (Қозон, Татаристон Республикаси) юбориш амалиётини давом эттириш таклиф этилди.
Маълумот учун, Ўзбекистон—Россия учинчи таълим форуми 2022 йилнинг 26-27 октябрь кунлари Самарқанд шаҳрида бўлиб ўтганди.
Изоҳ (0)