O‘zbekistonda 15-martdan piyoz eksportiga qo‘yilgan vaqtinchalik cheklov bekor qilindi. Bu haqda Qishloq xo‘jaligi vazirligi axborot xizmati xabar berdi.

Piyoz narxining keskin o‘sishi, aholining ichki iste’mol talabini qondirish hamda oziq-ovqat xavfsizligini ta’minlash maqsadida hukumat topshirig‘i bilan 1-yanvardan piyoz eksportiga vaqtincha cheklov o‘rnatilgandi. Ushbu cheklov 4 oy amal qilishi belgilangandi.

Vazirlik axborotiga ko‘ra, piyoz narxi barqarorlashgani sababli ushbu cheklov muddatidan oldin bekor qilindi.

Hisob-kitoblarga ko‘ra, 2023-yilning 20-yanvaridan 30-apreliga qadar tibbiy me’yorlar bo‘yicha aholining piyozga bo‘lgan iste’mol talabi o‘rtacha 346 ming tonnani tashkil etadi.

Ma’lumot uchun, O‘zbekistondan tashqari, Qozog‘iston, Tojikiston va Qirg‘izistonda ham piyoz eksporti cheklangandi. Qirg‘iziston Markaziy Osiyoda piyoz eksportiga qo‘yilgan taqiqni muddatidan oldin (3-martdan) bekor qilgan birinchi davlat bo‘ldi.