Davlat xavfsizlik xizmatining Samarqand viloyati bo‘yicha boshqarmasi tomonidan o‘tkazilgan tezkor tadbirlar davomida fuqarolarni noqonuniy ravishda AQSHga yubormoqchi bo‘lgan shaxslar qo‘lga olindi, deb xabar beradi O‘zA.
Xususan, Samarqand shahrida yashovchi, 1980-yilda tug‘ilgan shaxs o‘zganing ishonchiga kirib, 30 ming dollar evaziga tanishlari orqali uni Amerika Qo‘shma Shtatlariga yuborishini aytib, oldindan 10 ming dollar olgan vaqtida ushlangan.
Boshqa bir holatda esa Samarqand viloyatining Ishtixon tumanida yashovchi, 1996-yilda tug‘ilgan shaxs Jizzax viloyatining Do‘stlik tumanida istiqomat qiluvchi, 1981-yilda tug‘ilgan fuqaroning ishonchiga kirib, tanishlari yordamida uni Qo‘shma Shtatlarga yuborish evaziga 21 ming dollar talab qilgan.
DXX Jizzax viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda G‘allaorol tumanida o‘tkazilgan tezkor tadbirda, u 10 ming dollar va 100 million so‘m olgan vaqtida ushlangan.
Ta’kidlanishicha, mazkur holatlarda fuqarolarga O‘zbekiston—Turkiya—Yevropa—Meksika—AQSH yo‘nalishida Qo‘shma Shtatlarga ishlash uchun yuborish vaʼda qilingan.
Hozirda mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Toshkentda fuqaroni 20 ming dollar evaziga AQSHga yubormoqchi bo‘lgan talaba ushlangani, Samarqand shahrida 64 nafar fuqaroni AQSHga yuborishini aytib, ularning 4 milliard so‘mini o‘zlashtirganlarga sud hukmi o‘qilgani to‘g‘risida xabar berilgandi.
Izoh (0)