Buxoro shahrida qizning sir saqlanishi lozim bo‘lgan ma’lumotlarini tarqatish bilan qo‘rqitib, undan pul undirib kelgan shaxslar qo‘lga olindi. Bu haqda Buxoro viloyati IIB axborot xizmati xabar berdi.
Qayd etilishicha, Buxoro shahrida yashovchi 18 yoshli X.A. va A.I. oldindan jinoiy til biriktirib, Jondor tumanida yashovchi bir qizning behayo videolarini tarqatish va sharmanda qilish bilan qo‘rqitib kelgan.
Ular 2023-yil 6-fevral kunidan boshlab bir necha marotaba qizdan pul talab qilib olib, oxirgi marotaba talab qilingan 15 million so‘mdan 9,9 million so‘m miqdoridagi pullarni olgan. Ammo bu bilan kifoyalanmasdan ular qizni yana 4,1 million so‘m miqdoridagi pullarni berishga majbur qilish darajasiga keltirib qo‘ygan.
Qizning Buxoro viloyati IIBga qilgan murojaati asosida o‘tkazilgan tezkor tadbir davomida ushbu ikki shaxs Buxoro shahar Pedagogika instituti oldida talab qilingan pullarni olgan vaqtida ashyoviy dalil bilan qo‘lga olingan.
Holat yuzasidan Jinoyat kodeksining 165-moddasi (tovlamachilik) 2-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
Avvalroq Samarqandda shaxsiy yozishmalar va suratlarni tarqatmaslik uchun erkakdan pul talab qilgan yigit ushlangandi.
Izoh (0)