“Bayram kunlari ham valyuta ayirboshlash shoxobchalari ishlaydi” — Markaziy bank

O‘zbekistonda aholiga valyuta operatsiyalarini amalga oshirishda qo‘shimcha qulayliklar yaratish maqsadida 18-22-mart kunlari ham tijorat banklarining valyuta ayirboshlash va xalqaro pul o‘tkazmalari shoxobchalari faoliyat ko‘rsatadi. Bu haqda Markaziy bank matbuot xizmati xabar berdi.

Shu bilan birga, kunning istalgan vaqtida chet el valyutasini ayirboshlash imkonini beradigan “24/7” rejimida ishlovchi avtomatlashtirilgan valyuta ayirboshlash bankomatlari o‘rnatilgan.

Bundan tashqari, jismoniy shaxslar bank binosiga tashrif buyurmagan holda kunning istalgan vaqtida tijorat banklarining mobil ilovalari orqali bank kartalaridan foydalanib, masofadan valyuta ayirboshlash operatsiyasini amalga oshirish imkoniyatidan ham foydalanishi mumkin.

Bayram kunlari ham xizmat ko‘rsatadigan tijorat banklarining ro‘yxati bilan quyidagi havola orqali tanishish mumkin.

Avvalroq Sog‘liqni saqlash vazirligi O‘zbekistonda Navro‘z bayrami va dam olish sanalarida tibbiyot muassasalari uzluksiz ishlashini ma’lum qilgandi.