Давлат хавфсизлик хизматининг Самарқанд вилояти бўйича бошқармаси томонидан ўтказилган тезкор тадбирлар давомида фуқароларни ноқонуний равишда АҚШга юбормоқчи бўлган шахслар қўлга олинди, деб хабар беради ЎзА.
Хусусан, Самарқанд шаҳрида яшовчи, 1980 йилда туғилган шахс ўзганинг ишончига кириб, 30 минг доллар эвазига танишлари орқали уни Америка Қўшма Штатларига юборишини айтиб, олдиндан 10 минг доллар олган вақтида ушланган.
Бошқа бир ҳолатда эса Самарқанд вилоятининг Иштихон туманида яшовчи, 1996 йилда туғилган шахс Жиззах вилоятининг Дўстлик туманида истиқомат қилувчи, 1981 йилда туғилган фуқаронинг ишончига кириб, танишлари ёрдамида уни Қўшма Штатларга юбориш эвазига 21 минг доллар талаб қилган.
ДХХ Жиззах вилояти бўйича бошқармаси ходимлари томонидан Иқтисодий жиноятларга қарши курашиш департаментининг ҳудудий бошқармаси билан ҳамкорликда Ғаллаорол туманида ўтказилган тезкор тадбирда, у 10 минг доллар ва 100 миллион сўм олган вақтида ушланган.
Таъкидланишича, мазкур ҳолатларда фуқароларга Ўзбекистон—Туркия—Европа—Мексика—АҚШ йўналишида Қўшма Штатларга ишлаш учун юбориш ваъда қилинган.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Тошкентда фуқарони 20 минг доллар эвазига АҚШга юбормоқчи бўлган талаба ушлангани, Самарқанд шаҳрида 64 нафар фуқарони АҚШга юборишини айтиб, уларнинг 4 миллиард сўмини ўзлаштирганларга суд ҳукми ўқилгани тўғрисида хабар берилганди.
Изоҳ (0)