Samarqand shahrda 64 nafar fuqaroni AQSHga yuborishini aytib, ularning 4 milliard so‘mini o‘zlashtirganlarga sud hukmi o‘qildi. Bu haqda Ichki ishlar vazirligi axborot xizmati xabar berdi.
Xabarga ko‘ra, muqaddam firibgarlik jinoyati bilan sudlangan, Samarqand shahrida yashovchi 35 yoshli jinoiy guruh rahbari MCHJ tashkil etgan. O‘zi tomonidan tashkil etilgan jamiyatga 24-25 yoshli qizlarni ishchi sifatida yollagan. Rejaga ko‘ra uyishgan guruh aʼzolarini MCHJning Samarqand hamda JIzzax shahridagi filiallariga masʼul shaxs etib tayingan.
Ular o‘zini Green Card’dan yutuq chiqqan qiz sifatida tanishtirib, pullarni qo‘lga kiritgan. Shuningdek, yutuq chiqmagan fuqarolarga yutuq chiqqanini aytib, qarz shartnomasi va shunga o‘xshash soxta shartnomalarni tuzgan. Fuqarolarga aviachipta olib berish, AQSH elchixonasidan viza olish uchun qo‘lga kiritilgan pullarni MCHJning hisob raqamiga kirim qilgani to‘g‘risida soxta taklifnomalar ko‘rsatgan.
Jinoiy guruh jizzaxlik 19 nafar, samarqandlik 45 nafar jabrlanuvchilarning jami 4 milliard so‘mini qo‘lga kiritgan va o‘z manfaatlari yo‘lida ishlatib yuborgan. Holat jinoyat ishlari bo‘yicha Samarqand shahar sudida ko‘rib chiqildi. Guruh aʼzolarining ayrimlariga nisbatan 9 yil ozodlikdan mahrum qilish jazosi tayinlandi. Shuningdek, jinoiy guruhning 3 nafar qizi 5 yilga ozodlikdan mahrum etildi.
Bundan tashqari, sud jinoyat ishini tergov qilish jarayonida qo‘pol kamchiliklarga yo‘l qo‘ygani sababli Samarqand va Jizzax shahri bo‘yicha IIO FMB tergov bo‘limi tergovchilariga hamda guruh aʼzolaridan biriga mamlakatdan chiqib ketishiga imkon berish javobgarligini taʼminlamagani uchun Samarqand shahar IIO FMBga xususiy ajrim chiqardi.
Izoh (0)