BAA sunʼiy intellekt texnologiyalaridan foydalangan holda taʼlim boshqaruvida eng optimal qaror qabul qilish bo‘yicha O‘zbekiston hududida tajriba-sinov loyihasini ishga tushirishi mumkin.
Xabarga ko‘ra, maktabgacha va maktab taʼlimi vaziri Hilola Umarova boshchiligidagi O‘zbekiston delegatsiyasi Birlashgan Arab Amirligiga ishchi tashrifi davomida bir qator samarali uchrashuvlar o‘tkazdi. Hilola Umarova BAA taʼlim vaziri, doktor Ahmad Belhul Al Falasi bilan o‘tkazgan uchrashuvda tomonlar taʼlim sohasidagi hamkorlikning holati va istiqbollarini muhokama qildi.
O‘zbekistonda xorijiy til sifatida arab tili o‘qitiladigan maktablar uchun o‘quv-metodik majmualarni takomillashtirish bo‘yicha hamkorlik o‘rnatish, pedagoglarning malakasini oshirish, ular faoliyatini litsenziyalash bo‘yicha tajriba almashish, maktab o‘quvchilarini kasbga yo‘naltirish kabi masalalar to‘g‘risida fikr almashildi. Suhbat yakunida tomonlar barcha yo‘nalishlarda yaqindan hamkorlikni yanada chuqurlashtirish yuzasidan kelishib oldi.
Keltirilishicha, BAA prezidenti devonining taʼlim va tadqiqotlar bo‘yicha kotibi o‘rinbosari doktor Abdulloh Mug‘robiy bilan muloqotda STEAM fanlari hamda arab tilini o‘qitish bo‘yicha BAAdan mutaxassislarni jalb etish kabi sohalarda hamkorlikni yo‘lga qo‘yish masalalari muhokama qilindi. Muzokaralar natijasida Maktabgacha va maktab taʼlimi vazirligi hamda BAA prezidenti devonining taʼlim va tadqiqotlar bo‘yicha kotibiyati o‘rtasida anglashuv memorandumi imzolandi.
BAAning “Alef Education” tashkiloti bosh direktori Jefri Alonso va kompaniya vakillari bilan kechgan muloqot chog‘ida Alef raqamli taʼlim platformasini O‘zbekistonda mahalliy sharoitga moslashtirilgan holda joriy etish, katta hajmdagi maʼlumotlar (Big Data) va sunʼiy intellekt texnologiyalaridan foydalangan holda taʼlim boshqaruvida eng optimal qaror qabul qilish bo‘yicha mamlakat hududida tajriba-sinov loyihasini ishga tushirish, shuningdek, formativ va summativ baholash mexanizmini yo‘lga qo‘yish kabi yo‘nalishlarda yaqindan hamkorlik qilish masalalari muhokama qilindi.
Qayd etilishicha, O‘zbekiston delegatsiyasi, shuningdek, Xalifa fan va texnologiyalar universiteti ijrochi vitse-prezidenti Doktor Ahmad al Shoibi bilan uchrashuv o‘tkazdi. Unda tomonlar hamkorlikda ilmiy tadqiqotlar olib borish, xalqaro ilmiy konferensiyalarni birgalikda tashkil etish, tajriba almashish dasturini joriy etish bo‘yicha kelishib oldi.
Izoh (0)