БАА сунъий интеллект технологияларидан фойдаланган ҳолда таълим бошқарувида энг оптимал қарор қабул қилиш бўйича Ўзбекистон ҳудудида тажриба-синов лойиҳасини ишга тушириши мумкин.
Хабарга кўра, мактабгача ва мактаб таълими вазири Ҳилола Умарова бошчилигидаги Ўзбекистон делегацияси Бирлашган Араб Амирлигига ишчи ташрифи давомида бир қатор самарали учрашувлар ўтказди. Ҳилола Умарова БАА таълим вазири, доктор Аҳмад Белҳул Ал Фаласи билан ўтказган учрашувда томонлар таълим соҳасидаги ҳамкорликнинг ҳолати ва истиқболларини муҳокама қилди.
Ўзбекистонда хорижий тил сифатида араб тили ўқитиладиган мактаблар учун ўқув-методик мажмуаларни такомиллаштириш бўйича ҳамкорлик ўрнатиш, педагогларнинг малакасини ошириш, улар фаолиятини лицензиялаш бўйича тажриба алмашиш, мактаб ўқувчиларини касбга йўналтириш каби масалалар тўғрисида фикр алмашилди. Суҳбат якунида томонлар барча йўналишларда яқиндан ҳамкорликни янада чуқурлаштириш юзасидан келишиб олди.
Келтирилишича, БАА президенти девонининг таълим ва тадқиқотлар бўйича котиби ўринбосари доктор Абдуллоҳ Муғробий билан мулоқотда STEAM фанлари ҳамда араб тилини ўқитиш бўйича БААдан мутахассисларни жалб этиш каби соҳаларда ҳамкорликни йўлга қўйиш масалалари муҳокама қилинди. Музокаралар натижасида Мактабгача ва мактаб таълими вазирлиги ҳамда БАА президенти девонининг таълим ва тадқиқотлар бўйича котибияти ўртасида англашув меморандуми имзоланди.
БААнинг “Alef Education” ташкилоти бош директори Жефри Алонсо ва компания вакиллари билан кечган мулоқот чоғида Alef рақамли таълим платформасини Ўзбекистонда маҳаллий шароитга мослаштирилган ҳолда жорий этиш, катта ҳажмдаги маълумотлар (Big Datа) ва сунъий интеллект технологияларидан фойдаланган ҳолда таълим бошқарувида энг оптимал қарор қабул қилиш бўйича мамлакат ҳудудида тажриба-синов лойиҳасини ишга тушириш, шунингдек, форматив ва сумматив баҳолаш механизмини йўлга қўйиш каби йўналишларда яқиндан ҳамкорлик қилиш масалалари муҳокама қилинди.
Қайд этилишича, Ўзбекистон делегацияси, шунингдек, Халифа фан ва технологиялар университети ижрочи вице-президенти Доктор Аҳмад ал Шоиби билан учрашув ўтказди. Унда томонлар ҳамкорликда илмий тадқиқотлар олиб бориш, халқаро илмий конференцияларни биргаликда ташкил этиш, тажриба алмашиш дастурини жорий этиш бўйича келишиб олди.
Изоҳ (0)