Toshkent shahrida 17-mart kuni O‘zbekiston prezidenti huzuridagi Xavfsizlik kengashi apparati va Qirg‘iziston Xavfsizlik kengashi kotibiyati o‘rtasida maslahatlashuv bo‘lib o‘tdi.
O‘zbekiston tomondan Viktor Mahmudov, Qirg‘iziston tomondan Marat Imonqulov raisligida kechgan tadbirda davlatlar o‘rtasidagi strategik sheriklik munosabati o‘zaro ishonch va hurmat, bir-biri manfaatlarini hisobga olish va konstruktiv muloqot tamoyillari asosida rivojlanayotgani qayd etildi.
“Bugungi tahlikali davrda uchraydigan hech bir muammoni muayyan mamlakatning o‘zi mustaqil hal qila olmaydi. Shu bois barcha sohalar qatori xavfsizlik bilan bog‘liq masalalarni hal etishda ham hamkorlik juda muhim. 2019-yilda bo‘lib o‘tgan maslahatlashuvning birinchi davrasidan so‘ng o‘zaro aloqalarimiz sezilarli darajada chuqurlashdi. Bugungi muzokaralarimiz sherikligimizni yanada mustahkamlaydi, degan umiddamiz”, — deydi Marat Imonqulov.
Tomonlar konstruktiv hamkorlikni bundan keyin ham qo‘llab-quvvatlashga sodiqligini, xavfsizlik sohasidagi O‘zbekiston—Qirg‘iziston sherikligini, jumladan, shartnomaviy-huquqiy bazani mustahkamlash, birgalikdagi amaliy sa’y-harakatlar mexanizmini muvofiqlashtirish orqali rivojlantirishga qat’iy tayyor ekanini tasdiqladi. Uchrashuv yakunida xavfsizlikni ta’minlash sohasidagi hamkorlikni yanada kengaytirish va chuqurlashtirishga qaratilgan aniq yo‘nalishlar, chora-tadbirlar belgilangan maslahatlashuv protokoli imzolandi.
Izoh (0)