Qozog‘iston parlamenti senati “Qozog‘iston Respublikasi va O‘zbekiston Respublikasi o‘rtasida qozoq-o‘zbek davlat chegarasini demarkatsiya qilish to‘g‘risidagi bitimni ratifikatsiya qilish haqida”gi qonunni qabul qildi.
“2022-yil 22-dekabr kuni ikki davlat prezidentlari tomonidan Qozog‘iston-O‘zbekiston davlat chegarasini demarkatsiya qilish to‘g‘risidagi bitim imzolanishi bilan O‘zbekiston bilan chegarani qonuniy rasmiylashtirish jarayoni yakunlandi. Chegarani demarkatsiya qilish 2001 va 2022-yillardagi Qozog‘iston-O‘zbekiston davlat chegarasi to‘g‘risidagi kelishuvlar asosida amalga oshirildi”, — deb tushuntirdi Qozog‘iston tashqi ishlar vaziri o‘rinbosari Roman Vasilenko.
U demarkatsiya bo‘yicha muzokaralar 2003-yilda boshlanganini eslatib o‘tdi. Chegara belgilarini o‘rnatish bo‘yicha ishlar 2004-yildan 2021-yilgacha davom etgan. O‘tgan 19 yil davomida Qozog‘iston-O‘zbekiston qo‘shma demarkatsiya komissiyasining 100 ta yig‘ilishi va demarkatsiya bo‘yicha qo‘shma ishchi guruhining 34 ta yig‘ilishi bo‘lib o‘tgan.
“Keyingi 19 yil ichida demarkatsiya bilan bog‘liq jarayonlar davomida chegara chizig‘i o‘tadigan nuqtalarga aniqlik kiritildi. Bunda har ikki tomonning mahalliy aholisi manfaatlari va chegarani qo‘riqlashning qulayligi inobatga olindi. Shu tariqa chegara chizig‘i 5 kilometrga uzaytirildi. Aniqroq aytganda, butun chegara uzunligi 2 356 kilometr 666 metrni tashkil etdi. Chegara chizig‘iga 1301 ta chegara belgilari o‘rnatilgan“, — deydi Vasilenko.
Izoh (0)