NASA 15-mart kuni Axiom Space vakillari bilan birgalikda 2025-yilda Artemis 3 missiyasi doirasida astronavtlarning Oyga qo‘nishi uchun mo‘ljallangan skafandr prototipini taqdim etdi. Bu haqda The Guardian xabar berdi.
Maxsus kiyim o‘tgan asrning 60-yillari oxiri va 70-yillari boshlarida astronavtlar Oy yuzasida sayohat qilganlarida ishlatgan skafandrlarga qaraganda ancha moslashuvchan. U ayollar uchun ko‘proq mos keladi va Oyga parvozdan keyin hech qachon Yerga qaytmaydi. NASA rejasiga ko‘ra, 2025-yil oxirida Artemis 3 missiyasi doirasida to‘rtta astronavt Oyga uchadi va ulardan ikki nafari uning yuzasiga qo‘na oladi. Ushbu missiya doirasida birinchi marta ayol uchishi rejalashtirilgan.
Axiom Space tomonidan NASA uchun ishlab chiqilgan yangi skafandr AxEMU deb ataladi. U modernizatsiyalangan, qulay va moslashuvchan bo‘lishi uchun sezilarli darajada qayta ishlangan. Mazkur skafandrlar qora, ko‘k va olovrangda taqdim qilingan, biroq Axiom Space prototipidan farqli o‘laroq, haqiqiy skafandrlar oq rangda bo‘ladi. Shu tariqa astronavtlar Oyning janubiy qutbida quyosh radiatsiyasining issiqligidan yaxshiroq himoyalanadi, u yerga 50 yil ichida birinchi marta odam qo‘nadi.
Bundan tashqari, skafandrlar tabiiy yo‘ldosh orbitasida abadiy qolishi va hech qachon Yerga qaytmasligi ma’lum bo‘ldi. Sababi “Orion” kosmik kemasining o‘ziga xos vazn cheklovlari bor, astronavtlar Yerga qaytish uchun yengilroq kostyumlarga o‘tishi kerak bo‘ladi. Gap shundaki, kosmonavtlar bortga Oy tuprog‘ining bir qismini va ehtimol qo‘shimcha jihozlarni olib chiqadi. Bularning barchasi skafandrlarni qoldirib ketish orqali amalga oshirish mumkin.
Izoh (0)