AQSH harbiy-havo kuchlari qo‘mondonligi Rossiyaning Su-27 samolyoti Qora dengizda AQSHning MQ-9 droni ustidan yonilg‘i to‘kkani aks etgan videoni namoyish qildi.
Video AQSH Mudofaa vazirligi vizual axborot xizmati saytiga joylashtirilgan. Tasvirning davomiyligi tahrirlangan, biroq voqealar ketma-ket ko‘rsatilgan.
“2023-yil 14-mart kuni Rossiyaning ikkita Su-27 samolyoti Qora dengiz ustidagi xalqaro havo hududida AQSH harbiy-havo kuchlarining MQ-9 razvedka, kuzatuv dronini xavfli va noprofessional tutib oldi. MQ-9 dronining vinti shikastlangan, natijada AQSH kuchlari xalqaro suvlarda MQ-9 samolyotini urib tushirishga majbur bo‘ldi”, — deyiladi xabarda.
Kadrlarda Rossiya samolyoti MQ-9 droniga urilishidan oldin unga yonilg‘i to‘kkani aks etganini ko‘rish mumkin. Havodagi to‘qnashuv 30-40 daqiqa davom etgan.
Avvalroq AQSH Harbiy-havo kuchlarining Yevropa qo‘mondonligi 14-mart kuni Rossiyaning Su-27 samolyoti Qora dengizdagi xalqaro havo hududida “ehtiyotsizlik va noprofessionallik” tufayli AQSH dronini urib tushirganini ma’lum qilgandi. Oq uy AQSH prezidenti Jo Bayden voqea yuzasidan xabardor qilinganini bildirgan. Davlat departamenti bu borada Rossiya bilan muzokara olib bormoqchi. O‘z navbatida, AQSH Rossiyaning Vashingtondagi elchisini Qora dengizdagi dron bilan bog‘liq hodisa tufayli Davlat departamentiga chaqirgan. Rossiya Mudofaa vazirligi Qora dengizda AQSH droni urib tushirilgani bo‘yicha bayonot bergan.
Izoh (0)