Қозоғистон парламенти сенати “Қозоғистон Республикаси ва Ўзбекистон Республикаси ўртасида қозоқ-ўзбек давлат чегарасини демаркация қилиш тўғрисидаги битимни ратификация қилиш ҳақида”ги қонунни қабул қилди.
“2022 йил 22 декабрь куни икки давлат президентлари томонидан Қозоғистон-Ўзбекистон давлат чегарасини демаркация қилиш тўғрисидаги битим имзоланиши билан Ўзбекистон билан чегарани қонуний расмийлаштириш жараёни якунланди. Чегарани демаркация қилиш 2001 ва 2022 йиллардаги Қозоғистон-Ўзбекистон давлат чегараси тўғрисидаги келишувлар асосида амалга оширилди”, — деб тушунтирди Қозоғистон ташқи ишлар вазири ўринбосари Роман Василенко.
У демаркация бўйича музокаралар 2003 йилда бошланганини эслатиб ўтди. Чегара белгиларини ўрнатиш бўйича ишлар 2004 йилдан 2021 йилгача давом этган. Ўтган 19 йил давомида Қозоғистон-Ўзбекистон қўшма демаркация комиссиясининг 100 та йиғилиши ва демаркация бўйича қўшма ишчи гуруҳининг 34 та йиғилиши бўлиб ўтган.
“Кейинги 19 йил ичида демаркация билан боғлиқ жараёнлар давомида чегара чизиғи ўтадиган нуқталарга аниқлик киритилди. Бунда ҳар икки томоннинг маҳаллий аҳолиси манфаатлари ва чегарани қўриқлашнинг қулайлиги инобатга олинди. Шу тариқа чегара чизиғи 5 километрга узайтирилди. Аниқроқ айтганда, бутун чегара узунлиги 2 356 километр 666 метрни ташкил этди. Чегара чизиғига 1301 та чегара белгилари ўрнатилган“, — дейди Василенко.
Изоҳ (0)