O‘zbekistonda Navro‘z bayrami arafasida belgilangan dam olish kunlari sabab viloyatlarga qo‘shimcha poyezdlar qatnovi yo‘lga qo‘yiladi. Bu haqda “O‘zbekiston temiryo‘llari” matbuot xizmati xabar berdi.
Qayd etilishicha, hozirda temiryo‘l chiptalari tanqisligi vujudga kelish holatlari kuzatilmoqda. “Buning asosiy sababi temiryo‘l chiptalarining xamyonbopligi hamda boshqa transport turlariga nisbatan qulayligi va xavfsizligidadir”, — deyiladi xabarda.
Yo‘lovchilarning talab va istaklaridan kelib chiqqan holda temiryo‘llarning xarakat jadvali hamda ichki imkoniyatlarni inobatga olib, bayram arafasida yo‘lovchilarga quyidagi qulayliklar yaratildi:
- 17-martdan 22-martga qadar Samarqand—Toshkent—Samarqand yo‘anlishida yuqori tezlikda harakatlanuvchi 767/768-sonli “Afrosiyob” elektropoyezdi;
- 20-, 21-mart kunlari Toshkent—Qarshi—Toshkent yo‘nalishida yuqori tezlikda harakatlanuvchi 780/779-sonli “Afrosiyob” elektropoyezdi;
- 19-, 21-mart kunlari Toshkent—Urganch—Toshkent yo‘nalishida harakatlanuvchi 156f/155f-sonli yo‘lovchi poyezdlar qatnovi yo‘lga qo‘yildi.
Bundan tashqari, 16-mart kunidan 25-mart kuniga qadar Toshkent—Termiz—Toshkent, Toshkent—Urganch—Toshkent, Toshkent—Qo‘ng‘irot—Toshkent hamda Andijon—Xiva—Andijon yo‘nalishlaridagi yo‘lovchi poyezdlarga qo‘shimcha ikkitadan beshtagacha vagonlar ulanishi rejalashtirilgan.
Maʼlumot uchun, 2023-yilning 1-mart kunidan 15-mart kuniga qadar temiryo‘l transporti orqali 345 154 nafar yo‘lovchi tashilgan.
Avvalroq Samarqand—Toshkent—Samarqand “Afrosiyob” elektropoyezdi yo‘nalishida qo‘shimcha 6 ta reys qatnovi, Toshkent—Qarshi—Toshkent yo‘nalishida qo‘shimcha 2 ta reys qatnovi yo‘lga qo‘yilishi haqida xabar berilgan edi. Bundan tashqari, 20-martdan boshlab Shahrisabz—Samarqand—Shahrisabz yo‘nalishida tezyurar yo‘lovchi poyezd harakati boshlanadi.
Izoh (0)