Farg‘ona viloyati Oltiariq tumanida diniy mazmundagi materiallarni tarqatgan yigit javobgarlikka tortildi. Bu haqda viloyat IIB axborot xizmati xabar berdi.
Qayd etilishicha, 9-mart kuni Oltiariq tumani IIB TQX TQKB xodimlari tomonidan tezkor tadbir o‘tkazilgan. Tadbir davomida tumanning “Sertut” mahalla hududida yashovchi 22 yoshli M.Z. Telegram’dagi har xil nomdagi guruhlari orqali diniy mazmundagi audio va video formatdagi diniy maʼruzalarini tarqatgani aniqlangan.
Holat yuzasidan Oltiariq tumani IIB tomonidan Maʼmuriy javobgarlik to‘g‘risidagi kodeksning 184-2-moddasi (diniy mazmundagi materiallarni qonunga xilof ravishda tayyorlash, saqlash, olib kirish yoki tarqatish) bilan hujjatlar rasmiylashtirilib, Jinoyat ishlari bo‘yicha Qo‘qon shahar sudiga yuborilgan.
Sud huquqbuzar M.Z.ga yuqoridagi moddaga asosan BHMning 3 barobar miqdorida (900 ming so‘m) jarima jazosi tayinlagan.
Avvalroq Toshkent shahar Shayxontohur tumanida diniy mutaassiblikni targ‘ib qilgan 20 yoshli qizga chora ko‘rilgandi. Shuningdek, Toshkentda tanishiga nashida yuborgani uchun qamalgan talaba yigit ozod qilingani to‘g‘risida xabar berilgandi.
Izoh (0)