Bosh prokuratura mamlakatda energetika sohasiga oid biror-bir qonun buzilishiga guvoh bo‘lganlar xabar berishi uchun maxsus Telegram-botni ishga tushirdi.
Idora fuqarolarni energetika sohasidagi har qanday qonunbuzilishi holatlarini bartaraf etish, noqonuniy foydalanilayotganini o‘z vaqtida aniqlashda faol hamkorlikka chaqirilgan.
Buning uchun ular o‘zlari yashayotgan hududda energetika sohasiga oid biror-bir qonunbuzilishiga guvoh bo‘lishsa, bu haqda EnergonazoratBot orqali xabar berishlari mumkin.
“Buning uchun qonunbuzilishi holatini suratga olasiz va maxsus Telegram-botga kirib, obekt joylashgan hududni yozib, yuborish tugmasini bosasiz. Maxsus Telegram-botga kelib tushgan har qanday ma’lumot prokuratura organlarida tashkil qilingan Ishchi guruhga avtomatik tarzda kelib tushadi. Ishchi guruh tomonidan har bir qonunbuzilish holati haqidagi ma’lumot sinchiklab o‘rganib chiqiladi va natijasi bo‘yicha qonuniy choralar ko‘riladi”, — deyiladi xabarda.
Prezident qarori bilan yoqilg‘i-energiya resurslaridan oqilona va samarali foydalanishni taʼminlash va bu boradagi jarayonlarni raqamlashtirish maqsadida 2023-yil 1-martdan boshlab “O‘zenergoinspeksiya”ga “Hududiy elektr tarmoqlari” AJ, “Hududgaztaʼminot” AJ, “O‘zbekiston milliy elektr tarmoqlari” AJ, “O‘ztransgaz” AJlarning elektr energiyasi va tabiiy gazni nazorat qilish hamda hisobga olishning avtomatlashtirilgan tizimlaridagi yoqilg‘i-energiya resurslari isteʼmoli to‘g‘risidagi maʼlumotlarni monitoring qilish imkoniyati yaratilishi aytilgan edi.
Avvalroq Senat O‘zbekistonda elektr, gaz va suvni talon-toroj qilish o‘g‘rilik jinoyati deb baholanishini ma’qullagandi.
Izoh (0)