O‘zbekistonda referendumga tayyorgarlik ko‘rish xarajatlari 182 milliard 386 million so‘mga baholandi. Bu haqda Markaziy saylov komissiyasining navbatdagi majlisida komissiya a’zosi Adham Ibodullayev ma’lum qildi.
Adham Ibodullayev majlisda Markaziy saylov komissiyasi Iqtisodiyot va moliya vazirligi bilan hamkorlikda ishlab chiqilgan referendumga tayyorgarlik ko‘rish va uni o‘tkazish bilan bog‘liq xarajatlar smetasi haqida batafsil ma’lumot berdi.
“Mazkur xarajatlar smetasi davlat budjetida belgilangan mablag‘lar doirasida shakllantirildi va o‘rnatilgan tartibda Iqtisodiyot va moliya vazirligi bilan kelishildi. Xarajatlar smetasini shakllantirishda referendum to‘g‘risidagi qonun talablaridan kelib chiqib, referendumga tayyorgarlik ko‘rish va uni o‘tkazish bilan bog‘liq barcha mablag‘ talab etiladigan jihatlar alohida hisobga olindi”, — deb qayd etgan MSK a’zosi.
Oliy Majlis Senati 14-mart kuni bo‘lib o‘tgan majlisda yangi tahrirdagi Konstitutsiya to‘g‘risidagi qonun loyihasi bo‘yicha referendum o‘tkazish to‘g‘risidagi qarorni maʼqullagandi. Qonun loyihasi “Xalq so‘zi” va “Narodnoye slovo” gazetalarining 15-mart kungi sonida eʼlon qilindi. Qonun loyihasi 6 bo‘lim, 155-moddadan iborat. Konstitutsiyaviy qonun referendum yakunlari Markaziy saylov komissiyasi tomonidan rasmiy eʼlon qilingan kundan eʼtiboran kuchga kiradi.
Eslatib o‘tamiz, 2021-yilda bo‘lib o‘tgan O‘zbekiston prezidenti sayloviga tayyorgarlik ko‘rish va uni o‘tkazish bilan bog‘liq xarajatlarni moliyalashtirish uchun 300 milliard so‘m ajratilgan edi.
Izoh (0)