Eduard Saakashvili Deutsche Welle nashriga bergan intervyusida otasi, Gruziyaning uchinchi prezidenti Mixail Saakashvili og‘ir xastaligi va hayoti xavf ostidaligini aytdi.
Eduard Saakashvili otasini oxirgi marta 2022-yilning kuzida ko‘rganini aytdi. Shundan keyin u uzoq vaqt Gruziyada bo‘lgan bo‘lsa-da, otasi bilan ko‘rishish imkoni bo‘lmaganini ta’kidladi. Eduard Saakashvilining sog‘lig‘idagi o‘zgarishlarni OAV va yaqinlari orqali bilgan.
“Gap otamning ichki organlari ishdan chiqishi haqida ketmoqda. U deyarli ikki baravar vazn yo‘qotdi. Unda nevrologik muammolar bor, miya shikastlanishi, xatti-harakati o‘zgargani ehtimoli bor. Ya’ni uni oxirgi marta ko‘rganimda ham juda yomon ahvolda edi. Endi esa qarindoshlarimdan uning ahvoli ancha yomonlashganini bildim. U qattiq kasal va hayoti xavf ostida”, — deydi Eduard Saakashvili.
U Mixail Saakashvilining qamoqqa olinishi siyosiy qaror ekanini aytib, uning ozod etilishi yoki yana qamoqqa olinishi ham siyosiy qaror bo‘lishini bildirdi.
Eduardning ta’kidlashicha, u Gruziya hukumati “ma’naviy va siyosiy nuqtayi nazardan to‘g‘ri qaror” qabul qiladigan “sharoit yaratishga” harakat qilmoqda.
“Ayni paytda Yevroparlament uni ozod qilishga da’vat etuvchi bir qancha rezolyutsiyalarni qabul qildi. Yevropa Ittifoqiga a’zo 27 davlat Gruziya hukumatiga otamni davolanish uchun qo‘yib yuborish bo‘yicha rasmiy murojaat yo‘lladi. Fransiya prezidenti Emmanuel Makron yaqinda matbuot anjumanida bu haqda gapirdi. Yevropada doimiy e’tiborning mavjudligi muhim jarayon. Chunki bu Gruziya hukumatini to‘g‘ri qaror qabul qilishga undaydi, deb o‘ylayman. Oxir-oqibat, ular uni ozod qiladimi yoki yo‘qmi, Gruziya hukumatiga bog‘liq”, — dedi u.
Saakashvilini Gruziyada hibsga olish va qiynoqlar
2021-yil 1-oktabrda Saakashvili sakkiz yil ichida birinchi marta munitsipal saylovlar arafasida Gruziyaga qaytganida hibsga olingan. U bir qancha jinoiy ishlarda, xususan, 2005-yilda gruziyalik sobiq deputat Valeriy Gelashviliga hujum uyushtirganlikda ayblanmoqda. Buning uchun u allaqachon sirtdan olti yillik qamoq jazosiga hukm qilingan.
Hibsga olingandan so‘ng Saakashvili darhol ochlik e’lon qilgan va u 2021-yil 19-noyabrda ochlikni to‘xtatishga rozi bo‘lgan. 29-noyabr kuni Saakashvili hibsga olinganidan keyin birinchi marta sudga olib borilgan va hibsda qiynoqqa solinganini aytgan. U o‘ziga qo‘yilgan ayblovlarni siyosiy ta’qib, o‘zini esa siyosiy mahbus deb biladi.
Uzoq davom etgan ochlik e’lonidan so‘ng siyosatchining ahvoli og‘irlashgan, shu sababli u Rustav qamoqxonasidan Goridagi harbiy gospitalga o‘tkazilgan.
2022-yil dekabrida Ukraina Tashqi ishlar vazirligi o‘sha paytda Tbilisidagi Vivamedi tibbiyot markazida bo‘lgan Saakashvilining sog‘lig‘i sezilarli darajada yomonlashganidan chuqur xavotirda ekanini bildirgan.
2023-yilning 1-fevralida Ukraina prezidenti Vladimir Zelenskiy Gruziya hukumati Saakashvilini “omma oldida qiynoqqa solib, o‘ldirayotganini” aytdi. Saakashvilining o‘zi esa Ukrainadagi urush g‘alabasigacha yashay olmasa, yuragini Kiyevga dafn etishga chaqirdi.
Izoh (0)