Yevroparlament Gruziya hukumatini 2021-yil kuzidan beri hibsda saqlanayotgan sobiq prezident Mixail Saakashvilini ozod qilishga va uning xorijda davolanishiga ruxsat berishga chaqiruvchi rezolyutsiyani ma’qulladi.
Yevroparlamentning press-relizida qayd etilishicha, deputatlar siyosatchining sog‘lig‘i keskin yomonlashganidan jiddiy xavotirda, shuning uchun ular Gruziya rasmiylarini Saakashvilining salomatligi va farovonligini ta’minlash, shuningdek, unga munosib muolaja uchun mas’ul ekanini unutmasliklarini so‘ramoqda.
Bundan tashqari, hujjatda mamlakatda mahbuslarga nisbatan qanday munosabatda bo‘linishi hukumatning Yevropa qadriyatlariga sodiqligi borasida muhim ko‘rsatkich ekani alohida qay etilgan.
Yevroparlament boshqa bir hujjatda Yevropa Kengashi va Yevropa Ittifoqidagi hamkorlarini Gruziya sobiq bosh vaziri Bidzina Ivanishviliga qarshi sanksiyalar joriy etishga chaqirdi. Rezolyutsiyada u Saakashvilining shaxsiy qasos uchun ta’qib qilinishga javobgar oligarx deb atalgan.
Hujjatni 577 nafar deputat qo‘llab-quvvatladi, 33 kishi qarshi ovoz berdi.
Yevroparlament rezolyutsiyasi qonuniy majburlash kuchiga ega emas.
Saakashvili nega qamalgandi?
2018-yilning yanvarida Tbilisi shahar sudi Mixail Saakashvilini sirtdan uch yillik qamoq jazosiga hukm qilgan edi, sud bank xodimi Sandro Girgvlianining o‘ldirilishi bo‘yicha ish doirasida siyosatchini mansab vakolatini suiiste’mol qilish moddasi bo‘yicha aybdor deb topgan. O‘sha yilning yozida sud Saakashvilini sobiq parlament deputati Valeriy Gelashviliga hujum uyushtirganlikda ayblab, olti yillik qamoq jazosiga hukm qildi.
2021-yil oktabr oyida sobiq prezident yashirincha Gruziyaga qaytdi, biroq u tez orada hibsga olindi. Qamoqxonada siyosatchining ahvoli yomonlasha boshladi. 2022-yilning may oyidan beri Saakashvili Tbilisidagi Vivamed klinikasida. Sud majlislarida 20 nafar shifokor Saakashvilining ahvoli og‘ir ekanini aytgan. 2023-yil fevralida Tbilisi shahar sudi himoyachining Saakashvilini jazodan ozod qilishni yoki hukmlarning ijrosini to‘xtatib turishni talab qilgan iltimosnomasini qanoatlantirishdan bosh tortdi.
Avvalroq Ukraina Tashqi ishlar vazirligi Gruziya rasmiylaridan siyosatchini “tahqirlashni bas qilishni” va uni Kiyevga qaytarishni talab qilgandi, chunki Saakashvili Ukraina fuqaroligiga ega.
Izoh (0)