Ukraina Tashqi ishlar vazirligi Gruziyada panjara ortida saqlanayotgan Ukraina fuqarosi Mixail Saakashviliga nisbatan munosabatga keskin norozilik bildirdi. Vazirlik saytida tegishli bayonot e’lon qilindi.
“Gruziya hukumati Mixail Saakashviliga nisbatan psixologik va jismoniy zo‘ravonlik qo‘llamoqda, unga shoshilinch tibbiy yordam ko‘rsatishni rad etilib, siyosatchi hayotiga ataylab xavf tug‘dirmoqda. Ukraina fuqarosiga nisbatan inson huquqlarining qo‘pol ravishda buzilishi Tbilisining Yevropa Ittifoqiga a’zo bo‘lish bo‘yicha e’lon qilgan da’vosiga zid keladi va Gruziyada demokratiyaning cheklanishidan dalolat beradi”, — deyiladi bayonotda.
Tashqi ishlar vazirligi Gruziya hukumatini Saakashvili ustidan masxara qilishni zudlik bilan bas qilishga va uni Ukrainaga topshirishga chaqirgan. Shuningdek, vazirlik xorijiy hukumatlar va xalqaro tashkilotlarga Gruziya hukumati tomonidan siyosiy repressiyalar tufayli hayoti xavf ostida qolgan Ukraina fuqarosi, Gruziyaning sobiq prezidentini ochiq himoya qilishni so‘ragan.
Saakashvilini Gruziyada hibsga olish va qiynoqlar
2021-yil 1-oktyabrda Saakashvili sakkiz yil ichida birinchi marta munitsipal saylovlar arafasida Gruziyaga qaytganida hibsga olingan. U bir qancha jinoiy ishlarda, xususan, 2005-yilda gruziyalik sobiq deputat Valeriy Gelashviliga hujum uyushtirganlikda ayblanmoqda. Buning uchun u allaqachon sirtdan olti yillik qamoq jazosiga hukm qilingan.
Hibsga olingandan so‘ng Saakashvili darhol ochlik e’lon qilgan va u 2021-yil 19-noyabrda ochlikni to‘xtatishga rozi bo‘lgan. 29-noyabr kuni Saakashvili hibsga olinganidan keyin birinchi marta sudga olib borilgan va hibsda qiynoqqa solinganini aytgan. U o‘ziga qo‘yilgan ayblovlarni siyosiy ta’qib, o‘zini esa siyosiy mahbus deb biladi.
Uzoq davom etgan ochlik e’lonidan so‘ng siyosatchining ahvoli og‘irlashgan, shu sababli u Rustav qamoqxonasidan Goridagi harbiy gospitalga o‘tkazilgan.
2022-yil dekabrida Ukraina Tashqi ishlar vazirligi o‘sha paytda Tbilisidagi Vivamedi tibbiyot markazida bo‘lgan Saakashvilining sog‘lig‘i sezilarli darajada yomonlashganidan chuqur xavotirda ekanini bildirgan.
2023-yilning 1-fevralida Ukraina prezidenti Vladimir Zelenskiy Gruziya hukumati Saakashvilini “omma oldida qiynoqqa solib, o‘ldirayotganini” aytdi. Saakashvilining o‘zi esa Ukrainadagi urush g‘alabasigacha yashay olmasa, yuragini Kiyevga dafn etishga chaqirdi.
Izoh (0)