Muolaja uchun qamoqdan kasalxonaga o‘tkazilgan Gruziya sobiq prezidenti Mixail Saakashvili o‘zining ahvoli “o‘lim yoqasida” ekanini aytdi. Bu haqda siyosatchi Sky News’ga advokati orqali ma’lum qildi.
“Avval 120 kilogramm bo‘lganman, hozir bo‘lsa 64, agar 60 dan kamaysam, shifokorlar ko‘plab a’zolar yetishmovchiligini prognoz qilmoqda”, — deya uning so‘zlarini keltiradi telekanal.
Saakashvili, shuningdek, “suyaklari yemirilayotgani” sabab “chidab bo‘lmas og‘riq” xis qilayotganini aytdi.
Sobiq prezidentning advokati Shalva Xachapuridzening ta’kidlashicha, mijozining ahvoli kundan kunga yomonlashmoqda.
Telekanal bilan yozishmalarida Saakashvili Gruziyada “xorijiy agentlar” haqidagi qonun loyihasiga qarshi namoyishchilarga murojaatida ularni “o‘ta hushyor bo‘lishga” chaqirdi.
Hukmron “Gruziya orzusi” partiyasi Saakashviliga yetarlicha yordam berilayotgani, sog‘lig‘i bilan bog‘liq muammolar siyosatchining normal ovqatlanishdan bosh tortishi sababidanligini bildirgan.
Saakashvili 55 yoshda. U 2007-yildan 2013-yilgacha Gruziya prezidenti bo‘lgan. Keyinchalik u Ukrainaga ko‘chib o‘tib dastlab prezident maslahatchisi, keyin Odessa viloyati rahbari bo‘lib ishladi.
Siyosatchi 2021-yilgi munitsipal saylovlar oldidan Gruziyaga qaytgach hibsga olinib, qamoqqa jo‘natildi. Sobiq prezidentga nisbatan mansab vakolatini suiiste’mol qilish, sobiq deputatni kaltaklash va davlat mablag‘larini o‘zlashtirish kabi jinoyat ishlari qo‘zg‘atilgan.
Saakashvili hibsga olinganidan keyin ahvoli yomonlashgani haqida xabar berdi. Fransiya prezidenti Emmanuel Makron Tbilisini sobiq prezidentni ozod qilishga chaqirdi. Ukraina rahbari Vladimir Zelenskiy Saakashvili tufayli Gruziya hukumatini tanqid qildi.
6-fevral kuni Tbilisi sudi Saakashvilini ozod qilishdan bosh tortdi.
Izoh (0)