Namanganda fuqarolar haqida salbiy axborot tarqatmaslik evaziga pul talab qilib kelgan bloger ushlandi

Namangan viloyatida tovlamachilik bilan shug‘ullanib kelgan bloger qo‘lga olindi, deb xabar beradi viloyat IIB axborot xizmati.

Qayd etilishicha, 4-mart kuni Yangiqo‘rg‘on tumanida yashovchi fuqaro tuman IIB boshlig‘i nomiga ariza bilan murojaat qilib, Telegram’dagi kanallarning biriga shaxsiy suratlari turli bo‘htonlar bilan joylashtirilayotganini bildirgan. Fuqaro ushbu xabarlarning tarqatilishida shu tumanda yashovchi blogerdan gumonlanib, u bilan uchrashgan. O‘z navbatida bloger kanal administratori bilan aloqaga chiqib, masalani hal qilib berish evaziga 600 dollar talab qilganini aytgan.

Arizaga asosan Namangan viloyati IIB Jinoyat-qidiruv boshqarmasi, Korrupsiya va iqtisodiy jinoyatlarga qarshi kurashish bo‘limi hamda Yangiqo‘rg‘on tumani IIB xodimlari tomonidan tezkor tadbir o‘tkazilgan. Shu kuni soat 14:00 larda arizada nomi keltirilgan shaxs arizachidan kimyoviy ishlov berilgan 400 dollar va 1 million 150 ming so‘m pulni olgan vaqtida ashyoviy dalillar bilan ushlangan.

Tergovga qadar tekshiruvlar davomida ushbu bloger boshqa fuqarolardan ham salbiy axborotlarni kanalida chiqarmaslik evaziga pul talab qilib kelgani ma’lum bo‘lgan.

Aniqlanishicha, mazkur shaxs 2021-yilda Jinoyat kodeksining 168-moddasi (Firibgarlik) 2-qismi bilan sudlangan. Hozirda holat yuzasidan Jinoyat kodeksining 165-moddasi (Tovlamachilik) bilan jinoyat ishi qo‘zg‘atilib, tergov harakatlari olib borilmoqda.