Наманган вилоятида товламачилик билан шуғулланиб келган блогер қўлга олинди, деб хабар беради вилоят ИИБ ахборот хизмати.
Қайд этилишича, 4 март куни Янгиқўрғон туманида яшовчи фуқаро туман ИИБ бошлиғи номига ариза билан мурожаат қилиб, Telegram'даги каналларнинг бирига шахсий суратлари турли бўҳтонлар билан жойлаштирилаётганини билдирган. Фуқаро ушбу хабарларнинг тарқатилишида шу туманда яшовчи блогердан гумонланиб, у билан учрашган. Ўз навбатида блогер канал администратори билан алоқага чиқиб, масалани ҳал қилиб бериш эвазига 600 доллар талаб қилганини айтган.
Аризага асосан Наманган вилояти ИИБ Жиноят-қидирув бошқармаси, Коррупция ва иқтисодий жиноятларга қарши курашиш бўлими ҳамда Янгиқўрғон тумани ИИБ ходимлари томонидан тезкор тадбир ўтказилган. Шу куни соат 14:00 ларда аризада номи келтирилган шахс аризачидан кимёвий ишлов берилган 400 доллар ва 1 миллион 150 минг сўм пулни олган вақтида ашёвий далиллар билан ушланган.
Терговга қадар текширувлар давомида ушбу блогер бошқа фуқаролардан ҳам салбий ахборотларни каналида чиқармаслик эвазига пул талаб қилиб келгани маълум бўлган.
Аниқланишича, мазкур шахс 2021 йилда Жиноят кодексининг 168-моддаси (Фирибгарлик) 2-қисми билан судланган. Ҳозирда ҳолат юзасидан Жиноят кодексининг 165-моддаси (Товламачилик) билан жиноят иши қўзғатилиб, тергов ҳаракатлари олиб борилмоқда.
Изоҳ (0)