9-mart kuni Toshkentda Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasi hamda BMT Taraqqiyot dasturining O‘zbekistondagi vakolatxonasi bilan hamkorlikda xalqaro xotin-qizlar kuniga bag‘ishlangan davra suhbati bo‘lib o‘tdi.
“O‘zbekistonda gender raqamli tafovut: qisqartirish yo‘llari va usullari” mavzusidagi davra suhbatida Oliy Majlis Senatining Xotin-qizlar va gender tenglik masalalari qo‘mitasi, Raqamli texnologiyalar vazirligi, Maktabgacha va maktab taʼlimi vazirligi, Bandlik va kambag‘alikni qisqartirish vazirligi, Oila va xotin-qizlar qo‘mitasi, Yoshlar ishlari agentligi, Oliy taʼlim, fan va innovatsiyalar vazirligi, O‘zbekiston yetakchi ayollari muloqoti platformasi, gender adolat liderlari — volontyorlari, fuqarolik jamiyati va OAV vakillari ishtirok etdi.
Majlisda qayd etilishicha, dunyo aholisining deyarli yarmini tashkil qiluvchi ayollarning 37 foizi turli sabablarga ko‘ra internetdan foydalana olmaydi. Erkaklarga qaraganda 259 million kamroq ayollar internetga kirish imkoniga ega. Agar xotin-qizlar internetga kira olmasalar zaruriy raqamli ko‘nikmalarni rivojlantira olmaydi.
O‘zbekistondagi BMT TDning 2022-yilda o‘tkazgan “O‘zbekistonda gender raqamli tafovut”ni aniqlash bo‘yicha o‘rganishlari xotin-qizlarning raqamli ko‘nikmalari erkaklarnikidan qariyb 24 foizga ortdaligini tasdiqladi.
AKT soxasida 35 yoshdan oshgan ayollar 35 yoshdan kichik ayollarga qaraganda 10 foizga kam malakaga ega. Ilg‘or raqamli ko‘nikmalarga ega bo‘lgan ayollar 36 foizga yuqori daromad oladi. Shuningdek, oliy maʼlumotli ayollar oliy maʼlumotga ega bo’lmagan ayollarga qaraganda 46 foiz ko‘proq raqamli ko‘nikmaga ega.
Tadbir davomida “O‘zbekistonda gender raqamli tafovut”ini aniqlash bo‘yicha natijalar ko‘rib chiqildi. Xotin-qizlarning jamiyatdagi rolini oshirish, gender tenglikka ushbu tafovutni qisqartirish orqali erishish yo‘llari va rejadagi chora-tadbirlar haqida muzokaralar olib borildi. Ushbu mavzu yuzasidan tadbir ishtirokchilarning salbiy gender stereotiplari bilan ham kurashish borasidagi taklif va tavsiyalari eshitildi.
Tadbir so‘nggida ishtirokchilar O‘zbekistonda gender raqamli tafovutni qisqartirish orqali gender tenglikka erishish bo‘yicha yangi yondashuvlar, g‘oya va tashabbuslar yuzasidan fikr almashilib, taklif va tavsiyalar ishlab chiqildi.
Izoh (0)