9 март куни Тошкентда Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси ҳамда БМТ Тараққиёт дастурининг Ўзбекистондаги ваколатхонаси билан ҳамкорликда халқаро хотин-қизлар кунига бағишланган давра суҳбати бўлиб ўтди.
“Ўзбекистонда гендер рақамли тафовут: қисқартириш йўллари ва усуллари” мавзусидаги давра суҳбатида Олий Мажлис Сенатининг Хотин-қизлар ва гендер тенглик масалалари қўмитаси, Рақамли технологиялар вазирлиги, Мактабгача ва мактаб таълими вазирлиги, Бандлик ва камбағаликни қисқартириш вазирлиги, Оила ва хотин-қизлар қўмитаси, Ёшлар ишлари агентлиги, Олий таълим, фан ва инновациялар вазирлиги, Ўзбекистон етакчи аёллари мулоқоти платформаси, гендер адолат лидерлари — волонтёрлари, фуқаролик жамияти ва ОАВ вакиллари иштирок этди.
Мажлисда қайд этилишича, дунё аҳолисининг деярли ярмини ташкил қилувчи аёлларнинг 37 фоизи турли сабабларга кўра интернетдан фойдалана олмайди. Эркакларга қараганда 259 миллион камроқ аёллар интернетга кириш имконига эга. Агар хотин-қизлар интернетга кира олмасалар зарурий рақамли кўникмаларни ривожлантира олмайди.
Ўзбекистондаги БМТ ТДнинг 2022 йилда ўтказган “Ўзбекистонда гендер рақамли тафовут”ни аниқлаш бўйича ўрганишлари хотин-қизларнинг рақамли кўникмалари эркакларникидан қарийб 24 фоизга ортдалигини тасдиқлади.
АКТ сохасида 35 ёшдан ошган аёллар 35 ёшдан кичик аёлларга қараганда 10 фоизга кам малакага эга. Илғор рақамли кўникмаларга эга бўлган аёллар 36 фоизга юқори даромад олади. Шунингдек, олий маълумотли аёллар олий маълумотга эга бўлмаган аёлларга қараганда 46 фоиз кўпроқ рақамли кўникмага эга.
Тадбир давомида “Ўзбекистонда гендер рақамли тафовут”ини аниқлаш бўйича натижалар кўриб чиқилди. Хотин-қизларнинг жамиятдаги ролини ошириш, гендер тенгликка ушбу тафовутни қисқартириш орқали эришиш йўллари ва режадаги чора-тадбирлар ҳақида музокаралар олиб борилди. Ушбу мавзу юзасидан тадбир иштирокчиларнинг салбий гендер стереотиплари билан ҳам курашиш борасидаги таклиф ва тавсиялари эшитилди.
Тадбир сўнггида иштирокчилар Ўзбекистонда гендер рақамли тафовутни қисқартириш орқали гендер тенгликка эришиш бўйича янги ёндашувлар, ғоя ва ташаббуслар юзасидан фикр алмашилиб, таклиф ва тавсиялар ишлаб чиқилди.
Изоҳ (0)