O‘zbekistonda davlat organlari va tashkilotlarida genderga oid audit o‘tkaziladi

O‘zbekistonda davlat organlari va tashkilotlarida xotin-qizlar va erkaklar uchun teng huquq ta’minlanganini o‘rganish maqsadida genderga oid audit o‘tkaziladi. Bu haqda Adliya vazirligining “Huquqiy axborot” Telegram-kanali xabar berdi.

Qayd etilishicha, “Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi qonunga o‘zgartish va qo‘shimchalar kiritildi. Shunga ko‘ra, qonunga quyidagi yangi tushunchalar kiritildi:

genderga oid audit — davlat organlari va tashkilotlari faoliyatida, shu jumladan kadrlar siyosatini olib borishda xotin-qizlar va erkaklar uchun teng huquq hamda imkoniyatlar kafolatlari to‘g‘risidagi qonunchilik talablariga rioya etilishi holatini, shuningdek genderga doir kompleks yondashuvni o‘rganish va baholash;

genderga doir kompleks yondashuv – davlat organlari va tashkilotlari tomonidan o‘z faoliyatini, shu jumladan kadrlar siyosatini olib borishni xotin-qizlar va erkaklar uchun teng huquq hamda imkoniyatlar kafolatlari to‘g‘risidagi qonunchilikka muvofiq tashkil etish.

Genderga oid auditning asosiy vazifalari quyidagilardan iborat:

• davlat organlari va tashkilotlarida xotin-qizlar va erkaklar sonining nisbatini o‘rganish;
• davlat organlari va tashkilotlari o‘z faoliyatini genderga doir kompleks yondashuv asosida tashkil etganligi holatini o‘rganish;
• xotin-qizlar va erkaklar uchun teng huquq hamda imkoniyatlarni ta’minlash sohasidagi qonunchilikning ijro etilish holatini baholash;
• xotin-qizlar va erkaklar uchun teng huquq hamda imkoniyatlarni ta’minlash bo‘yicha takliflar ishlab chiqish.

Qonun rasmiy e’lon qilingan kundan e’tiboran kuchga kiradi.

Mavzuga doir: “Maktabgacha ta’limdan boshlab oliy ta’limgacha gender tengligi, zo‘ravonlikka murosasizlik tushunchalarini singdirib borish kerak” — Tanzila Norboyeva