O‘zbekistonda 2023-yil mart oyidan boshlab mobil internet tezligi oshiriladi va mamlakat bo‘ylab 5G texnologiyasi joriy etiladi. Bu haqda “O‘zbektelekom” AK axborot xizmati rahbari Temur Mamajonov maʼlum qildi.
Xabarga ko‘ra, loyiha doirasida mavjud tayanch stansiyalari modernizatsiya qilinib, yangilari o‘rnatiladi. Shu jumladan, butun mamlakat bo‘ylab 3 mingdan ortiq tayanch stansiyalarini eng so‘nggi texnologiyalar bo‘yicha yangilash, shuningdek, 2 mingdan ortiq yangi tayanch stansiyalarini qurib ishga tushirish rejalashtirilgan. Bunda O‘zbekiston bo‘ylab mobil aloqa sifati yaxshilanadi, LTE standartidagi mobil internet tezligi hamda uning qamrovi oshiriladi.
Ta’kidlanishicha, loyihaning muhim bosqichi qator tayanch stansiyalarini 5G standartiga o‘tkazish jarayoni hisoblanadi. Natijada abonentlar beshinchi avlod tezligida mobil internetdan bemalol foydalanishlari mumkin bo‘ladi.
“O‘zbekistonda birinchi galda flagman smartfonlar, jumladan, iPhone egalari 5G texnologiyasidagi mobil internetdan foydalanish imkoniyatiga ega bo‘ladi. Uztelecom O‘zbekistonda mazkur qurilmalar foydalanuvchilariga beshinchi avlod aloqa imkoniyatlaridan foydalanish imkonini beruvchi birinchi operator bo‘ladi”, — deyiladi xabarda.
2022-yil dekabrda raqamli texnologiyalar vaziri Sherzod Shermatov O‘zbekiston aholisining internet xizmatidan foydalanuvchilari soni 31 milliondan ortganini ma’lum qilgandi. Vazirning qayd etishicha, xalqaro va shaharlararo telekommunikatsiya tarmog‘ini rivojlantirish maqsadida xalqaro internet tarmog‘iga ulanishning umumiy o‘tkazuvchanlik qobiliyati 2,6 barobar oshirilib, 3 200 Gbit/sekundga yetkazilgan.
Izoh (0)