Zoir Mirzayev 8-mart bayramiga 180 nafar xotin-qizga quyoshli panel sovg‘a qilib, xonadoniga bepul o‘rnatib berdi

Toshkent viloyati hokimi Zoir Mirzayev 8-mart — Xalqaro xotin-qizlar kuni munosabati bilan viloyatda ijtimoiy og‘ir ahvolga tushib qolgan, nogironligi bo‘lgan xotin-qizlar yashovchi 180 ta xonadonga quyoshli panellar sovg‘a qildi. Bu haqda “Daryo”ga viloyat hokimligi axborot xizmati xabar berdi.

Maʼlum qilinishicha, prezidentning 2023-yil 16-fevraldagi qaroriga asosan 2023-yil Toshkent viloyatida 1420 ta ijtimoiy soha obyekti va davlat idorasi, 5167 ta aholi xonadoni, 604 ta tadbirkorlik subyektiga quyoshli panellar o‘rnatish, mahalliy tadbirkorlar tomonidan umumiy quvvati 24,3 mVt bo‘lgan kichik FESlar qurilishi amalga oshiriladi. Hududda 12 ta kichik GESlar qurish, 72 ta ko‘p qavatli uyga quyosh panellari o‘rnatish, 74 ta g‘isht ishlab chiqaruvchi korxona hamda 1305 ta ijtimoiy soha obyekti, 59 ta issiqxonani ko‘mirga o‘tkazish rejalashtirilgan.

“O‘tgan davr mobaynida 73 ta ijtimoiy soha (27 ta maktab, 19 ta maktabgacha taʼlim tashkiloti) obyekti, 16 ta sog‘liqni saqlash muassasasi, 11 ta boshqa binoga, 164 ta davlat idoralari (23 ta hokimlik binolari, 66 ta bank, 12 ta boshqarmalar, 63 ta boshqa) binolariga quyosh panellari o‘rnatildi. Aholi xonadonlarining 404 tasiga quyosh panellari hamda 2,2 ming litr quyosh suv isitish uskunalari o‘rnatildi. 

“8-mart bayrami munosabati bilan ‘Temir daftar’ va ‘Ayollar daftari’ga kirgan 180 nafar xotin-qiz yashovchi xonadonga mahalliy budjet hisobidan, 224 ta xonadonga o‘z hisobi va bank kreditlari hisobidan quyoshli panellar o‘rnatildi”, — deydi viloyat hokimligi axborot xizmati rahbari Behzod Qobulov.

Taʼkidlanishicha, qaror ijrosini taʼminlash maqsadida kam taʼminlangan xonadonlarga quyosh panellarini o‘rnatib berish uchun viloyat mahalliy budjetidan 3 milliard so‘m mablag‘ ajratilgan.

“Ushbu mablag‘ hisobidan shahar va tumanlarda har bir sektordan kam taʼminlangan va daftarlarga kiritilgan 2 tadan xonadonga quyosh panellari yoki quyosh suv isitish uskunalari o‘rnatib beriladi. Ko‘mir yoqilg‘isiga o‘tkaziladigan 1305 ta ijtimoiy soha obyekti (424 ta MTM, 694 ta maktab, 187 ta sog‘liqni saqlash)ga loyiha institutlari biriktirildi. 113 tasida loyihalash ishlari tugallandi. Homiylar va budjetdan ajratilgan 12,3 milliard so‘m mablag‘ hisobidan hozirgacha 59 tasida qozonlar o‘rnatildi”, — deydi masʼullar.

Qo‘shimcha qilinishicha, hozirgacha gazda ishlovchi 59 ta issiqxonadan 21 tasi to‘liq ko‘mir yoqilg‘isiga o‘tkazilgan. 38 tasida ko‘mirda ishlovchi qozonlar o‘rnatilishi boshlangan. 74 ta g‘isht zavod to‘liq xatlovlan o‘tkazilib, barchasi tabiiy gaz tarmog‘idan uzilgan. 60 tasi to‘liq ko‘mirga o‘tkazilgan. 14 tasida ko‘mirda ishlashga moslashtirish ishlari olib borilmoqda.

“Viloyatda 900 MVt quvvatlik fotoelektr stansiyalarini qurish bo‘yicha Koreya davlatining Chung Dahm Power Corporation va Xitoy Xalq Respublikasining Anhui Conch New Energy Co., Ltd kompaniyalari bilan kelishuvga erishildi. Bundan tashqari, Yuqori Chirchiq tumanida Saudiya Arabistoni Akva Pover kompaniyasi bilan xamkorlikda quvvati 400 MVt bo‘lgan quyosh fotoelektr stansiyalarini qurish ishlari boshlandi”, — deydi Behzod Qobulov.