Pentagon AQSH portlarida joylashgan Xitoyda ishlab chiqarilgan ulkan kranlar XXR tomonidan kuzatuv va josuslik vositasi sifatida ishlatilayotgan bo‘lishi mumkinligidan xavotirda. Bu haqda manbalariga tayanib The Wall Street Journal xabar berdi.
Nashrning Pentagon va milliy xavfsizlik idoralaridagi manbalari Xitoyning ZPMC kompaniyasiga qarashli port kranlarini troya otiga qiyosladi. WSJ suhbatdoshlarining ta’kidlashicha, bu kranlar Amerikadan chiqib ketayotgan yoki kirib kelayotgan konteynerlarning dastlabki joyi va keyingi manzilini yozib olish va kuzatishi mumkin bo‘lgan murakkab datchiklar bilan jihozlangan. Ma’lumot o‘rnida, ba’zi portlar Pentagon tomonidan dunyo bo‘ylab harbiy yuklarni jo‘natish uchun ishlatiladi.
Xitoyning Vashingtondagi elchixonasi WSJga AQSHning josuslik kranlari haqidagi xavotirlari “ruhiy xastalikdan kelib chiqqani”ni iddao qildi. Diplomatlarning fikricha, Xitoy tahdidi haqidagi nazariyalar ikki davlat o‘rtasidagi savdo-iqtisodiy hamkorlikka faqat to‘sqinlik qiladi va Qo‘shma Shtatlarning o‘ziga zarar keltiradi.
2023-yil boshida Vashington Pekinni josuslik faoliyatida gumon qilganidan keyin AQSH va Xitoy o‘rtasidagi munosabatlar yana keskinlashdi. 4-fevral kuni Janubiy Karolina qirg‘oqlari yaqinida avvalroq AQSH osmonida bir necha kun uchib yurgan Xitoy havo shari urib tushirildi. Oq uyning bildirishicha, havo shari elektron razvedka uskunalari bilan jihozlangan. XXR esa shar meteorologik maqsadlarda ishlatilgani va tasodifan o‘z yo‘nalishini yo‘qotib, AQSH hududiga kirib qolganini ta’kidladi.
10—12-fevral kunlari AQSH harbiylari Alyaska qirg‘oqlari yaqinida, Kanadadagi Yukon hududi va Michigan shtatidagi Guron ko‘li ustida topilgan noma’lum uchar jismlarni urib tushirdi. Keyinchalik Oq uy urib tushirilgan obyektlar xavf tug‘dirmasligi va Xitoyning razvedka dasturi bilan bog‘liq emasligini ma’lum qildi.
Izoh (0)