Пентагон АҚШ портларида жойлашган Хитойда ишлаб чиқарилган улкан кранлар ХХР томонидан кузатув ва жосуслик воситаси сифатида ишлатилаётган бўлиши мумкинлигидан хавотирда. Бу ҳақда манбаларига таяниб The Wall Street Journal хабар берди.
Нашрнинг Пентагон ва миллий хавфсизлик идораларидаги манбалари Хитойнинг ЗPMC компаниясига қарашли порт кранларини троя отига қиёслади. WSJ суҳбатдошларининг таъкидлашича, бу кранлар Америкадан чиқиб кетаётган ёки кириб келаётган контейнерларнинг дастлабки жойи ва кейинги манзилини ёзиб олиш ва кузатиши мумкин бўлган мураккаб датчиклар билан жиҳозланган. Маълумот ўрнида, баъзи портлар Пентагон томонидан дунё бўйлаб ҳарбий юкларни жўнатиш учун ишлатилади.
Хитойнинг Вашингтондаги элчихонаси WSJ’га АҚШнинг жосуслик кранлари ҳақидаги хавотирлари “руҳий хасталикдан келиб чиққани”ни иддао қилди. Дипломатларнинг фикрича, Хитой таҳдиди ҳақидаги назариялар икки давлат ўртасидаги савдо-иқтисодий ҳамкорликка фақат тўсқинлик қилади ва Қўшма Штатларнинг ўзига зарар келтиради.
2023 йил бошида Вашингтон Пекинни жосуслик фаолиятида гумон қилганидан кейин АҚШ ва Хитой ўртасидаги муносабатлар яна кескинлашди. 4 февраль куни Жанубий Каролина қирғоқлари яқинида аввалроқ АҚШ осмонида бир неча кун учиб юрган Хитой ҳаво шари уриб туширилди. Оқ уйнинг билдиришича, ҳаво шари электрон разведка ускуналари билан жиҳозланган. ХХР эса шар метеорологик мақсадларда ишлатилгани ва тасодифан ўз йўналишини йўқотиб, АҚШ ҳудудига кириб қолганини таъкидлади.
10—12 февраль кунлари АҚШ ҳарбийлари Аляска қирғоқлари яқинида, Канададаги Юкон ҳудуди ва Мичиган штатидаги Гурон кўли устида топилган номаълум учар жисмларни уриб туширди. Кейинчалик Оқ уй уриб туширилган объектлар хавф туғдирмаслиги ва Хитойнинг разведка дастури билан боғлиқ эмаслигини маълум қилди.
Изоҳ (0)