AQSH davlat kotibi Marko Rubio 17-avgust kuni Rossiyaning amaldagi tinchlik muzokaralaridan ijobiy natija chiqmasa, unga nisbatan qo‘shimcha choralar qo‘llanishini ma’lum qildi. Bu haqda mahalliy nashrlarga tayanib, Anadolu xabar berdi.
“Tinchlik muzokaralari ijobiy natijasiz tugasa, Rossiyani yana qo‘shimcha oqibatlar kutadi. Biz esa buni oldini olish uchun tinchlik kelishuvi ustida ishlayapmiz”, dedi Marko Rubio.
Rubioga ko‘ra, diplomatiya va bosim o‘rtasida nozik muvozanat mavjud. Agar yangi va keskin sanksiyalar joriy etilsa, muzokaralar darhol to‘xtab qoladi. Shunday qilib, urush yana davom etaveradi.
Davlat kotibi haqiqiy tinchlik faqat murosa orqali erishilishini ta’kidlamoqda:
“Ikki tomon ham nimadandir voz kechmasa, o‘rtada sulh tuzishning imkoni bo‘lmaydi. Bunday holat tinchlik kelishuvi emas, taslim bo‘lish deb ataladi”.
Rubio, shuningdek, Tramp va Putin o‘rtasida o‘tgan uchrashuvda ayrim masalalarda kelishuv imkoniyatlari ko‘rilgani, ammo katta qarama-qarshiliklar hamon saqlanib qolayotganini bildirgan. Uning aytishicha, asosiy masalalar hududiy chegaralar, uzoq muddatli xavfsizlik kafolatlari va Ukrainaga harbiy ittifoq tuzish huquqi bilan bog‘liq.
“Tinchlik kelishuvi Ukraina ishtirokida bo‘lishi mumkin. Bu ularning mamlakati, hududi”, dedi Rubio.
Rubioning qo‘shimcha qilishicha, Alyaskada o‘tgan uchrashuvdan yakuniy kelishuv kutilmagan, chunki unda ukrainaliklar ishtirok etmagan.
Ma’lumot uchun, AQSH prezidenti Donald Tramp va Rossiya prezidenti Vladimir Putin 15-avgust kuni Alyaskada 3 soatlik yopiq eshiklar ortida uchrashuv o‘tkazgandi. Putin muzokaralar natijasida “muayyan tushuncha” shakllanganini bildirgan. Tramp esa asosiy masalalar bo‘yicha kelishuvga erishilganini, faqat ayrim kichik mavzular ochiq qolganini aytgan. Ayni paytda, Ukraina prezidenti Vladimir Zelenskiy 18-avgust kuni Vashingtonda Tramp bilan shaxsan uchrashib, muzokara takliflarini muhokama qilishi kutilmoqda.
Izoh (0)