Ўзбекистон ва Бирлашган Вена институти билан кадрларни тайёрлаш ва қайта тайёрлаш соҳасида ҳамкорлик қилиши кутилмоқда. Бу ҳақда “Дунё” хабар берди.
Хабарга кўра, Ўзбекистон элчиси Абат Файзуллаев Вена шаҳрида Бирлашган Вена институти (БВИ) директори Херве Жоли билан учрашди. Херве Жоли сўнгги йилларда Ўзбекистонда малакали кадрлар тайёрлашга қаратилаётган эътибор БВИ даражасида ҳам яхши самара берганини таъкидлади. Унинг айтишича, 2000—2016 йилларда Ўзбекистондан келган иштирокчилар сони ўртача 60 нафарни ташкил қилган бўлса, 2017 йилдан буён бу кўрсаткич икки баробарга ортиб, 2022 йилда 125 нафарга етди.
Мулоқот давомида республика мутахассисларининг малакасини ошириш, имкон қадар кўпроқ ходимларга имконият яратиш мақсадида Ўзбекистонда БВИ махсус курсларини ташкил этиш масаласига ҳам эътибор қаратилди.
Маълум қилинишича, томонлар учрашувда муҳокама қилинган масалалар юзасидан Ўзбекистон расмий ташкилотлари ва БВИ имкониятларидан келиб чиқиб, амалий ишларни бошлашга келишиб олди.
Маълумот учун, БВИ Марказий, Шарқий ва Жануби-Шарқий Европа, Кавказ ва Марказий Осиё минтақасидаги 31 та давлатда давлат хизматчиларини қайта тайёрлаш ва уларнинг малакасини оширишни қўллаб-қувватловчи муассаса ҳисобланади. Ушбу муассаса бугунги кунга қадар 49 мингдан ортиқ давлат хизматчиларини қайта тайёрлашга ёрдам берди. Институтда макроиқтисодий сиёсатни ишлаб чиқиш ва бошқариш, пул-кредит сиёсати ва валюта курси тизимини такомиллаштириш, молия сектори барқарорлигини таъминлаш, ташқи қарз сиёсатини амалга ошириш, солиқ сиёсати ва давлат харажатларини бошқариш бўйича турли курс ҳамда тренинглар ташкил этилмоқда.
Аввалроқ Ўзбекистонда Корея университети таълим стандартлари асосида шифокор ва ҳамширалар тайёрлаш йўлга қўйилиши хабар қилинганди.
Изоҳ (0)