Samarqand viloyati Jomboy tumanida fuqarolarni qo‘rqitib, yalang‘och holda suratga olgan va shu orqali ulardan pul talab qilgan ayol qo‘lga olindi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, 22 yoshli yigit Samarqand viloyati IIBga ariza bilan murojaat qilgan. Unda Jomboy tumanida yashovchi 25-30 yoshlardagi ayol fuqarolarning ishonchiga kirish orqali shahvoniy uydirmalar uyushtirib, fuqarolarni qo‘rqitish orqali yalang‘och holatda tasvirlarga tushirgan va ulardan tovlamachilik yo‘li bilan pul talab qilayotganini bildirgan. Shuningdek, ayol 2-3 nafar sportchi yigitdan iborat jinoiy guruh tuzganini ham taʼkidlagan.
Mazkur guruh ushbu yigitga shantaj qilib, undan yozgan “Tilxati”, haydovchilik guvohnomasi va mashinasi texpasportini qaytarib olishi evaziga 1500 dollar miqdorida pul so‘ragan. Yigit arizasida ularga nisbatan chora ko‘rilishini iltimos qilgan.
Arizaga asosan viloyat IIB Tezkor qidiruv xizmati Jinoyat qidiruv boshqarmasi Uyushgan jinoyatchilikka qarshi kurashish bo‘limi xodimlari tomonidan tezkor tadbir o‘tkazildi. Tadbirda ayol hamda uning sheriklari ushbu yigitdan 1500 dollari evaziga uning qarzdorlik “Tilxati”, haydovchilik guvohnomasi va texpasportini qaytarib berayotgan vaqtda daliliy ashyolar bilan ushlanib, tegishli tartibda hujjatlashtirib olindi.
Ayolning jinoiy sheriklari sportning “Milliy kurash”, “Qo‘l jangi”, “Boks”, “Muay-tay” va boshqa turlari bilan shug‘ullangan sportchilar bo‘lib, ular bundan tashqari juda ko‘p jinoyat va huquqbuzarliklar ham sodir etgani aniqlandi. Ular bir nechta jinoiy qilmishlarni tashkil etuvchi hamda zo‘ravonlikni targ‘ib qiluvchi holatlarni, jumladan, tuhmat qilish, o‘zgalar mulkini talon-taroj qilish, tovlamachilik, talonchilik hamda hujjatlarni egallash kabi qator jinoyatlarni sodir etgan.
Mazkur shaxslarga nisbatan Jinoyat kodeksining bir necha moddalari bilan jinoyat ishi qo‘zg‘atilib, hozirda tergov harakatlari olib borilmoqda.
Izoh (0)