Toshkentda 10-martdan issiqlik taʼminotini o‘chirish boshlanadi

Toshkent shahrida 10-martdan issiqlik taʼminotini o‘chirish boshlanadi. Bu haqda poytaxt hokimligi axborot xizmati xabar berdi. 

Xabarga ko‘ra, 10-martdan Toshkent shahrida 2022-2023-yilgi isitish davri yakunlanishi rejalashtirilmoqda.

Vazirlar Mahkamasining 2014-yil 15-iyuldagi “Kommunal xizmatlar ko‘rsatishni tasdiqlash qoidalari to‘risida”gi 194-sonli qaroriga muvofiq, xonalarni isitish ehtiyojlari uchun issiqlik energiyasini berishda Yetkazib beruvchi isitish davrini Qoraqalpog‘iston Vazirlar Kengashi, viloyatlar va Toshkent shahar hokimliklari tomonidan belgilangan muddatlarda boshlaydi va tamomlaydi.

Qarorga asosan, isitish davri tashqi havoning o‘rtacha sutkalik harorati 8 darajadan past bo‘lgan 5 kunlik davr tamom bo‘lgan kundan keyingi kundan boshlanishi, 8 darajadan yuqori bo‘lganda esa tamomlanishi kerak.

Shundan kelib chiqib, mart oyidan havo harorati isigani va o‘rtacha sutkalik harorat 10 darajadan yuqori bo‘layotganini inobatga olgan holda, 2023-yilning 10-mart kunidan 2022-2023-yilgi isitish davri yakunlanishi reja qilindi.