“Prezident bo‘lsang, nima qilar eding?” — Blinken O‘zJTUdagi ingliz tilini o‘qitish markazida o‘quvchilar darsida bo‘ldi (video)

AQSH davlat kotibi Entoni Blinken O‘zbekistonga rasmiy tashrifi doirasida Access dasturi yordamida ingliz tilini o‘rganayotgan bir guruh maktab o‘quvchilari bilan uchrashuvi videosini Twitter sahifasiga joyladi.

“O‘zbekistonda ingliz tilini o‘rganayotgan va o‘z kelajagi uchun katta-katta rejalar qo‘ygan o‘quvchilardan ilhomlandim”, — deya izoh yozgan AQSH davlat kotibi.

Shuningdek, Blinken o‘z postida AQSH O‘zbekistonda ingliz tilini o‘qitishga alohida e’tibor qaratayotgani, ingliz tilidagi ta’limga shu paytgacha 25 million dollardan ortiq mablag‘ ajratgani, 15 ming ingliz tili o‘qituvchilarining malakasini oshirish,10 mingta maktab darsliklar bilan ta’minlanish ustida ishlayotganini qayd etgan va bundan faxrlanishini bildirgan.

Toshkentga safari davomida Blinken O‘zbekiston davlat jahon tillari universitetiga tashrif buyurib, Access dasturi doirasida ingliz tilini o‘rganayotgan maktab o‘quvchilarining darsida ishtirok etgan. O‘quvchilar Amerikada Prezident kuni bayrami, shuningdek, sevimli filmlari, taomlari va mashg‘ulotlari haqida gapirgan. Ulardan “Agar prezident bo‘lsangiz nima qilardingiz?” degan savol so‘ralgan. Bunga javoban o‘quvchilar, prezident bo‘lsa, yoshlarni qo‘llab-quvvatlashi, mamlakatda ta’limni rivojlantirishi, aholining turmush tarzini yanada yaxshilashi haqida gapirgan.

Dars davomida Blinken xorijiy tilni o‘rganish bo‘yicha o‘z tajribasi bilan ham o‘rtoqlashgan. “Xorijiy tilni o‘rganish qanchalik qiyin ekanini unutganimcha yo‘q. Lekin bu juda ajoyib mashg‘ulot. Chunki xorijiy til sizga tafakkuringiz yuksalishiga yo‘l ochadi”, — deya bolalarga fransuz tilini qanday o‘rgangani haqida aytib bergan AQSH bosh diplomati.

Ma’lumot uchun, AQSHning Toshkentdagi elchixonasi amalga oshirayotgan Access (Ingliz tilini o‘rganish uchun mikrostipendiya) dasturi ingliz tilini maxsus o‘qitish yo‘nalishdagi loyihalardan biri hisoblanadi. 2022-yil noyabr oyida boshlangan ikki yillik dastur doirasida iqtisodiy ahvoli og‘ir oilalarning iqtidorli bolalari darsdan tashqari mashqlar va yozgi intensiv mashg‘ulotlarda ingliz tili asoslarini o‘rganishi rejalashtirilgan.

Eslatib o‘tamiz, AQSH davlat kotibi Entoni Blinken 1-mart kuni Toshkent shahriga tashrif buyurdi va prezident Shavkat Mirziyoyev bilan uchrashdi.