АҚШ давлат котиби Энтони Блинкен Ўзбекистонга расмий ташрифи доирасида Access дастури ёрдамида инглиз тилини ўрганаётган бир гуруҳ мактаб ўқувчилари билан учрашуви видеосини Twitter саҳифасига жойлади.
“Ўзбекистонда инглиз тилини ўрганаётган ва ўз келажаги учун катта-катта режалар қўйган ўқувчилардан илҳомландим”, — дея изоҳ ёзган АҚШ давлат котиби.
Шунингдек, Блинкен ўз постида АҚШ Ўзбекистонда инглиз тилини ўқитишга алоҳида эътибор қаратаётгани, инглиз тилидаги таълимга шу пайтгача 25 миллион доллардан ортиқ маблағ ажратгани, 15 минг инглиз тили ўқитувчиларининг малакасини ошириш,10 мингта мактаб дарсликлар билан таъминланиш устида ишлаётганини қайд этган ва бундан фахрланишини билдирган.
Тошкентга сафари давомида Блинкен Ўзбекистон давлат жаҳон тиллари университетига ташриф буюриб, Access дастури доирасида инглиз тилини ўрганаётган мактаб ўқувчиларининг дарсида иштирок этган. Ўқувчилар Америкада Президент куни байрами, шунингдек, севимли фильмлари, таомлари ва машғулотлари ҳақида гапирган. Улардан “Агар президент бўлсангиз нима қилардингиз?” деган савол сўралган. Бунга жавобан ўқувчилар, президент бўлса, ёшларни қўллаб-қувватлаши, мамлакатда таълимни ривожлантириши, аҳолининг турмуш тарзини янада яхшилаши ҳақида гапирган.
Дарс давомида Блинкен хорижий тилни ўрганиш бўйича ўз тажрибаси билан ҳам ўртоқлашган. “Хорижий тилни ўрганиш қанчалик қийин эканини унутганимча йўқ. Лекин бу жуда ажойиб машғулот. Чунки хорижий тил сизга тафаккурингиз юксалишига йўл очади”, — дея болаларга француз тилини қандай ўргангани ҳақида айтиб берган АҚШ бош дипломати.
Маълумот учун, АҚШнинг Тошкентдаги элчихонаси амалга ошираётган Access (Инглиз тилини ўрганиш учун микростипендия) дастури инглиз тилини махсус ўқитиш йўналишдаги лойиҳалардан бири ҳисобланади. 2022 йил ноябрь ойида бошланган икки йиллик дастур доирасида иқтисодий аҳволи оғир оилаларнинг иқтидорли болалари дарсдан ташқари машқлар ва ёзги интенсив машғулотларда инглиз тили асосларини ўрганиши режалаштирилган.
Эслатиб ўтамиз, АҚШ давлат котиби Энтони Блинкен 1 март куни Тошкент шаҳрига ташриф буюрди ва президент Шавкат Мирзиёев билан учрашди.
Изоҳ (0)